حیدرآباد: نیوزی لینڈ کے اسٹار بلے باز کین ولیمسن نے سری لنکا کے خلاف جاری ٹیسٹ میچ میں شاندار کارکردگی کا مظاہرہ کیا۔ انہوں نے پہلی اننگز میں نصف سنچری اسکور کی اور پھر دوسری اننگز میں 30 رنز کی اننگز کھیلی۔ ولیمسن نے راس ٹیلر کے سب سے زیادہ رنز بنانے ریکارڈ توڑ دیا، انھوں نے بین الاقوامی کرکٹ میں 18,199 رنز بنائے تھے۔
دائیں ہاتھ کے بلے باز ولیمسن میچ سے قبل ریکارڈ سے 72 رنز دور تھے اور انہوں نے دوسری اننگز میں کریز پر رہتے ہوئے یہ کارنامہ انجام دے دیا۔ ولیمسن کے اب انٹرنیشنل کرکٹ میں 359 میچوں میں 48.18 کی اوسط سے 18,213 رنز ہوگئے ہیں۔ قابل ذکر ہے کہ 34 سالہ ولیمسن نے قومی ٹیم کے لیے 2010 میں بھارت کے خلاف ڈیبیو کیا تھا۔
انہوں نے اُسی سال ہندوستان کے خلاف اپنا ریڈ بال ڈیبیو بھی کیا اور اگلے سال زمبابوے کے خلاف اپنا پہلا ٹی ٹوئنٹی میچ کھیلا۔ نیوزی لینڈ کے اس بلے باز نے 101 ٹیسٹ میچوں میں 8828 رنز، ون ڈے میں 6810 رنز اور 93 ٹی ٹوئنٹی میچوں میں 2575 رنز بنائے ہیں۔
جبکہ راس ٹیلر نے 112 ٹیسٹ میچوں کی 196 اننگز میں کل 7684 رنز بنائے ہیں جس میں تین ڈبل سنچری، 19 سنچری اور 35 نصف سنچری شامل ہے۔ اس کے علاوہ انھوں نے 236 ونڈے کے 220 اننگز میں کل 8602 رنز بنائے ہیں جس میں 21 سنچری اور 51 نصف سنچری ہیں اور 102 ٹی ٹوئنٹی میچ کی 94 اننگز میں کل 1909 رنز بنائے جس میں سات نصف سنچری شامل ہیں۔
