بارباڈوس:آئی سی سی ٹی 20 ورلڈ کپ 2024 کے فائنل میں ٹاس جیتنے کے بعد ہندوستان کے کپتان روہت شرما نے کہاکہ ٹیم ورک کی محنت کی وجہ سے آج ہم یہاں تک پہنچے ہیں۔ٹیم خطابی معرکہ کے لئے پوری طرح سے تیار ہیں۔ہم اپنی طرف سے بہترین کھیل کامظاہرہ کرنے کی کوشش کریں گے،انہوں نے مزید کہاکہ جنوبی افریقہ ایک اچھی ٹیم ہے۔
جنوبی افریقہ کے کپتان ایڈن مارکرم نے کہاکہ وہ ٹاس جیت کر پہلے بیٹنگ کرنا چاہتے تھے لیکن بدقسمتی سے ایسا نہیں ہوا۔اس کے باوجود ہم اپنی طرف سے شاندار کارکردگی کا مظاہرہ کرنے کی کوشش کریں گے۔انہوں نے مزہد کہاکہ ہماری ٹیم میں کوئی تبدیلی نہیں ہے۔
ٹی ٹوئنٹی ورلڈ کپ 2024 میں دونوں ٹیموں کے سفر پر نظر ڈالی جائے تو اب تک دونوں ٹیمیں ناقابل تسخیر رہی ہیں۔ ہندوستان اور جنوبی افریقہ کو اب تک ایک بھی میچ میں شکست کا سامنا نہیں کرنا پڑا۔ یہ پہلا موقع ہے کہ کوئی ٹیم ایک بھی میچ ہارے بغیر فائنل میں پہنچی ہے۔
ہندوستان نے گروپ مرحلے میں 3 فتوحات، سپر 8 مرحلے میں 3 جیت اور سیمی فائنل میں انگلینڈ کے خلاف ایک جیت درج کرکے اپنی ناقابل شکست مہم کو برقرار رکھا ہے۔ اس کے ساتھ ساتھ جنوبی افریقہ نے بھی اپنی ناقابل تسخیر مہم کو جاری رکھتے ہوئے افغانستان کو گروپ مرحلہ،سپر8 اور سیمی فائنل میں اپنی جیت کا ریکارڈ رکھا ہے۔
