وشاکھاپٹنم: انگلینڈ کے کپتان بین اسٹوکس نے کہا کہ ٹیم کو یقین تھا کہ وہ چوتھی اننگز میں انہیں دیا گیا 399 رن کا ہدف حاصل کر سکتی ہے۔ اسٹوکس نے میچ کے بعد ایوارڈ تقریب میں کہا، “چوتھی اننگز میں ہدف کو دیکھتے ہوئے ہمیں یقین تھا کہ ہم یہ ہدف حاصل کر سکتے ہیں۔ جب آپ کے سامنے کوئی بڑا ہدف ہوتا ہے، اسکور بورڈ کا دباؤ ہوتا ہے، تو یہ وہ موقع ہوتا ہے جب آپ خود کو ایک فرد کے طور پر بھی ثابت کرسکتے ہیں۔ جس طرح سے ہم نے بھارتی گیند بازوں پر دباؤ ڈالنے کی کوشش کی وہ واقعی بہترین تھا۔ بدقسمتی سے نتیجہ ہمارے حق میں نہیں نکلا۔ بھارت کو مبارک ہو، انہوں نے بہت اچھی کرکٹ کھیلی۔
انہوں نے کہا کہ کھلاڑیوں کو ایسا کوئی مشورہ نہیں دیا گیا تھا کہ انہیں کیسے کھیلنا ہے۔ ڈریسنگ روم میں موجود ہر کوئی ایک بہترین کھلاڑی ہے اور وہ جانتا ہے کہ کس طرح اپنی بہترین کارکردگی دکھانا ہے۔
انہوں نے کہا کہ ہم بھارتی بولنگ اٹیک کو بتانا چاہتے تھے کہ ہم اسی طرح کے ارادے سے کرکٹ کھیلنے والے ہیں۔ ہم انہیں مستحکم نہیں ہونا دینا چاہتے تھے۔ میں جانتا ہوں کہ اس کا کریڈٹ روہت شرما کو جاتا ہے، جس طرح انہوں نے ٹیم کی قیادت کی۔ جس طرح سے ہم نے دباؤ میں کرکٹ کھیلی میں اس سے بہت خوش ہوں۔
انہوں نے کہا کہ ہم نے دن کے اختتام پر ڈکٹ کی وکٹ گنوائی لیکن اسکور بورڈ پر ابھی بھی ہمارے 67 رن تھے، لیکن کرولی نے جس طرح سے چوتھے دن کا آغاز کیا اور بھارتی گیندبازی کے خلاف بیٹنگ کی، میں اس کے لیے بہت خوش ہوں اور مجھے لگتا ہے کہ یہ اننگز ان کے لیے سنگ میل ثابت ہوگی۔
انہوں نے کہا کہ تینوں اسپنروں ٹام ہارٹلی، شعیب بشیر اور ریحان احمد کی کارکردگی تسلی بخش رہی۔ انہوں نے کہا کہ جو روٹ اور جیمز اینڈرسن کے ساتھ تینوں نے شاندار گیندبازی کی ہے۔
واضح رہے کہ بھارت اور انگلینڈ کے درمیان وشاکھاپٹنم میں کھیلے گئے دوسرے ٹیسٹ میچ میں ٹیم انڈیا نے انگلینڈ کو 106 رنز سے شکست دے دی ہے۔ اس میچ میں بھارت نے انگلینڈ کو جیت کے لیے 399 رنز کا بڑا ہدف دیا تھا جس کا تعاقب کرتے ہوئے انگلینڈ کی پوری ٹیم 292 رنز پر ڈھیر ہو گئی۔ اس کے ساتھ سیریز ایک ایک کے برابری پر پہنچ گئی ہے۔ بھارت کی اس جیت کے ہیرو جسپریت بمراہ رہے۔ انہوں نے دونوں اننگز میں مجموعی طور پر 9 وکٹیں حاصل کیں۔
