ترال، پلوامہ: جموں وکشمیر اسمبلی انتخابات 2024 کے لیے وادیٔ کشمیر میں انتخابی سرگرمیاں اپنے پورے شباب پر ہیں۔ جگہ جگہ مختلف ریلیاں نکالی جا رہی ہیں۔ اسی طرح عوامی اتحاد پارٹی کی جانب سے اونتی پورہ اور ترال میں ایک میگا روڈ شو کا اہتمام کیا گیا۔ جس کی قیادت عوامی اتحاد پارٹی کے سربراہ رکن پارلیمنٹ انجینئر رشید کر رہے تھے۔
جب کہ اس موقع پر پارٹی کے سینیر لیڈر جی این شاہین اور پارٹی کے نامزد امیدوار ڈاکٹر ہربخش سنگھ بھی میگا روڈ شو میں موجود تھے۔ ترال بس اسٹینڈ میں ہزاروں کے اجتماع سے خطاب کرتے ہوئے انجینئر رشید نے بتایا کہ کشمیر میں عبداللہ اور مفتی خاندان نے آج تک تباہی مچائی ہے اور اب لوگوں کو اس حوالے سے سنجیدگی کا مظاہرہ کر کے ان طاقتوں کے خلاف جمہوری طریقے سے ووٹ دینا چاہیے۔
یہ بھی پڑھیں: جموں و کشمیر اسمبلی انتخابات: اے آئی پی اور کالعدم جماعت اسلامی کے درمیان اتحاد - AIP JeI Alliance |
انہوں نے بی جے پی کی مرکزی حکومت کو بھی آڑے ہاتھوں لیتے ہوئے کہا کہ مودی حکومت کو ڈرو مت، اور ڈراؤ مت کے ایجنڈے پر عمل پیرا ہونا چاہیے۔ انجینئر رشید نے میڈیا کو بتایا کہ جماعت اسلامی اور عوامی اتحاد پارٹی مل جل کر اسمبلی انتخابات لڑے گی۔ جہاں ہمارا امیدوار ہوگا ہم وہاں ان کا تعاون کریں گے اور جہاں وہ امیدوار کھڑے کریں گے ہم ان کی حمایت کریں گے۔
