سری نگر: نیشنل کانفرنس کے ترجمان اعلی اور رکن اسمبلی تنویر صادق نے کہا ہے کہ اگلے برس مارچ سے جموں وکشمیر کے لوگوں کو دو سو یونٹ بجلی مفت فراہم کی جائے گی۔ اس وقت ہماری ذمہ داری عوام کو بغیر کٹوتی کے بجلی فراہم کرنا ہے۔
ان باتوں کا اظہار تنویر صادق نے ہفتے کو سری نگر میں میڈیا نمائندوں کے ساتھ بات چیت کے دوران کیا۔ انہوں نے کہا کہ ہم دو سو یونٹ بجلی مفت فراہم کرنے کا وعدہ کرتے ہیں لیکن اس موسم سرما کے دوران ہماری کوشش یہ ہے کہ ہم بغیر کسی خلل یا کٹوتی کے لوگوں کو بجلی فراہم کریں۔
انہوں نے کہا کہ ہماری سرکار آج ہی دو سو یونٹ بجلی مفت فراہم کر سکتی ہے لیکن اس سے کٹوتی کا بوجھ بڑھ جائے گا جو ہم اس وقت نہیں چاہتے ہیں۔ لہذا دو تین مہینے کے بعد یعنی مارچ سے، ہم لوگوں کو دو سو یونٹ فری بجلی فراہم کریں گے۔
ایک سوال کے جواب میں تنویر صادق نے کہا کہ ایل جی انتظامیہ اور عمر عبداللہ قیادت والی سرکار کے درمیان کوئی رسہ کشی نہیں ہے۔ جو لوگ ایسی باتیں کرتے ہیں، وہ ایل جی انتظامیہ اور سرکار کے درمیان مشکلات پیدا کرنا چاہتے ہیں۔ جہاں تک ایل جی انتظامیہ اور سرکار کا تعلق ہے، دونوں کے درمیان کوئی رسہ کشی نہیں ہے۔ ایسے میں ہم چاہتے ہیں کہ یہاں دوہرا پاور سسٹم نہ ہو کیونکہ یہاں اب منتخب سرکار ہے۔ تنویر صادق نے مزید کہا ہمیں امید ہے کہ ریاستی درجہ جلد بحال کیا جائے گا جو لوگوں کا حق ہے۔
