بانڈی پورہ (جموں کشمیر): شمالی کشمیر کے بانڈی پورہ ضلع میں عید کی خوشی اس وقت ماند پڑ گئی جب منگل اور بدھ کی درمیانی شب ضلع کے بازی پورہ، اجس گاؤں میں تین رہائشی مکان اور ان میں موجود لاکھوں روپے مالیت کی املاک راکھ کے ڈھیر میں تبدیل ہو گئیں۔ حکام کا کہنا ہے کہ آتشزدگی کے سبب کوئی جانی نقصان نہیں ہوا تاہم آگ کے سبب رہائشی مکانات کو شدید نقصان پہنچا ہے۔
ایک عہدیدار نے تصدیق کرتے ہوئے کہا کہ ’’آگ، دوران شب ایک رہائشی مکان سے اچانک نمودار ہوئی جس نے اپنے نزدیکی دو دیگر مکانات کو بھی اپنی زد میں لے لیا۔‘‘ مقامی باشندوں کا کہنا ہے کہ آگ اس قدر بھیانک اور تیز تھی کہ اس نے آناً فاناً تینوں مکانات کو راکھ کے ڈھیر میں تبدیل کر دیا۔ لوگوں نے بتایا کہ انہوں نے پولیس اور فائر اینڈ ایمرجنسی عملہ کو مطلع کیا اور فائر ٹینڈرز نے بروقت کارروائی کرکے آگ پر قابو پالیا اور آگ کو مزید پھیلنے سے روک دیا۔
عہدیداروں نے بتایا کہ آگ لگنے کی وجہ بجلی شارٹ سرکٹ بتائی جا رہی ہے تاہم آگ لگنے کی اصل وجہ معلوم کرنے کے لیے پولیس نے مقدمہ درج کرکے تحقیقات کا آغاز کر لیا ہے۔ عہدیداروں نے بتایا کہ آگ کے سبب املاک کو شدید نقصان پہنچا ہے تاکہ کوئی جانی نقصان نہیں ہوا۔ دریں اثناء، مقامی باشندوں نے ضلع انتظامیہ سے متاثرہ کنبوں کی فوری امداد اور بازآبادکاری کی اپیل کی ہے تاکہ انہیں آگ کے سبب ہوئے نقصان کا کچھ حد تک ازالہ کرنے میں مدد حاصل ہو سکے۔
یہ بھی پڑھیں: پلوامہ میں آتشزدگی، رہائشی مکان کو نقصان
