سرینگر: سرینگر کی ایک فاسٹ ٹریک عدالت نے ریاست بہار سے تعلق رکھنے والے ایک شہری کو سرینگر کے جبہ کدل علاقے میں ایک 25 ساکہ لڑکی کے اغوا اور عصمت دری معاملے میں آٹھ برس کی قید سنائی۔ کورٹ نے مجرم پر 20 ہزار روپے کا جرمانہ بھی عائد کیا۔ بدھ کو سیکنڈ ایڈیشنل جج، ریونیو، نے لال پورہ، بھیم نگر، بہار کے رہنے والے سنتوش کمار پاسوان ولد سیدر پاسوان کو پولیس اسٹیشن کرالہ کھڈ سرینگر میں درج ایف آئی آر زیر نمبر 201632 میں مجرم قرار دیتے ہوئے یہ سزا سنائی۔ عدالت نے یہ حکم بھی جاری کیا ہے کہ مجرم پر عائد کی گئی کل سزا میں سے اب تک گزرنے والی مدت ختم کی جائے۔
سرینگر پولیس نے پاسوان کے خلاف سال 2016 میں ایک نابالغ لڑکی کے اغوا اور عصمت دری کے سلسلے میں چارج شیٹ داخل کی تھی۔ استغاثہ کے مطابق یکم ستمبر 2016 کو لڑکی کے والد نے پولیس اسٹیشن کرالہ کھڈ میں شکایت درج کی تھی کہ ان کی بیٹی اچانک گھر سے لاپتہ ہوگئی ہے تاہم انہیں شک ہے کہ اسے اغو کیا گیا ہے۔ انہوں نے شکایت میں یہ بھی کہا تھا کہ ان کے گھر میں سنتوش کمار پاسوان نام کا ایک غیر مقامی شہری مستری کا کام کرتا تھا جو کام ختم کرنے کے بعد بھی ان کے گھر آتا جاتا تھا، جس پر انہیں شک ہے۔
پراسیکیوشن نے کہا کہ پولیس کی چھان بین کے بعد لڑکی اور اغوا کار کو ہمہامہ کے نزدیک موٹر سائیکل پر سوار مشکوک حالت میں ہوائی اڈے کی طرف جاتے ہوئے پایا گیا۔ ایسے میں پولیس نے انہیں گرفتار کر کے پولیس چوکی ہمہامہ پہنچایا، پولیس نے موٹر سائیکل اور سرینگر سے دہلی کی ایئر ٹکٹس کو بھی ضبط کیا۔ پراسیکیوشن نے مزید کہا تھا کہ ملزم اس (متاثرہ) کے گھر آتا جاتا تھا اور متاثرہ لڑکی کی معصومیت کا فائدہ اٹھا کر مجرم نے لڑکی کے ساتھ غیر قانونی تعلقات قائم کیے تھے۔ وا ضح رہے کہ کیس میں استغاثہ کی نمائندگی اے پی پی فاروق ملک نے کی۔
یہ بھی پڑھیں: سرینگر تیزاب حملہ کے مجرم کو عمر قید کی سزا
