ترال اسپتال میں ایک مشین خراب، تین ماہ سے نہیں ہو رہا آنکھوں کا آپریشن

مائیکرواسکوپ خراب ہونے سے سب ضلع اسپتال ترال کے آنکھوں کا آپریشنل یونٹ غیر فعال ہو چکا ہے، اور گزشتہ تین ماہ سے ایک بھی جراحی عمل میں نہیں لائی گئی ہے۔

پلوامہ (جموں کشمیر) : جنوبی کشمیر کے ترال علاقے کا واحد سب ڈسٹرکٹ اسپتال، ترال ’’نام بڑے اور درشن چھوٹے‘‘ کی عملی مثال بنا ہوا ہے، جہاں بنیادی ڈھانچے کی عدم دستیابی اور ضروری مشینری کی عدم موجودگی سے علاقے کے لوگوں کو سخت مشکلات درپیش ہیں۔ سب ضلع اسپتال میں بگڑے نظام کا اندازہ اس بات سے لگایا جا سکتا ہے کہ اسپتال کا امراض چشم کا یونٹ تین ماہ سے محض ایک مشین کی خرابی کی وجہ سے غیر فعال بنا ہوا ہے۔ حالانکہ یونٹ میں ایک سرجن ڈاکٹر اور کئی نیم طبی ملازمین موجود تو ہیں لیکن ایک مایکراس کوپ تین ماہ سے خراب پڑا ہوا ہے جو کی وجہ سے یہاں آنکھوں کے آپریشن نہیں کیے جا رہے ہیں۔

ترال کے باشندوں نے بتایا کہ یہ علاقے کا واحد بڑا اسپتال ہے اور اب لوگ آنکھوں کا علاج کرانے یا تو سرینگر یا پھر امرتسر جانے پر مجبور ہو رہے ہیں۔ لوگوں نے الزام عائد کیا کہ ’’جان بوجھ کر ڈاکٹر صاحبان غریب لوگوں کو پرائیویٹ اداروں، نجی اسپتالوں کی طرف دھکیل رہے ہیں، جس سے غریب عوام مشکلات میں مبتلا ہو رہے ہیں۔‘‘

مقامی باشندوں نے حکام سے سب ضلع اسپتال میں خراب ہو چکی مشین کو فوراً سے پیشتر ٹھیک کرانے اور عوام کو راحت پہنچانے کی اپیل کی ہے۔ ادھر، بی ایم او ترال، ڈاکٹر ظہور احمد نے ای ٹی وی بھارت کو بتایا کہ یہ بات سچ ہے کہ تین ماہ سے مشین خراب پڑی ہوئی ہے۔ حالانکہ انہوں نے متعلقہ کمپنی ’’میڈسٹی‘‘ کو اس بارے میں کئی بار آگاہ کیا ہے اور انہیں یقین ہے کہ اگلے ہفتے سے باقاعدہ طور اسپتال میں آنکھوں کا آپریشنل یونٹ فعال ہوگا۔