بارہمولہ: حکام نے بدھ کو شمالی کشمیر کے بارہمولہ ضلع کے رفیع آباد گاؤں میں محاصرے اور تلاشی کارروائی کے پیش نظر دو تعلیمی اداروں کو بند کر دیا۔ حکام کے مطابق گورنمنٹ ڈگری کالج ہادی پورہ اور پنش میں کلاس ورک بدھ کو معطل رہے گا۔ حکام کے مطابق ’’یہ فیصلہ طلباء اور عملے کی حفاظت کو یقینی بنانے اور مخصوص علاقے کی موجودہ صورت حال کے پیش نظر احتیاطی تدابیر کے تحت لیا گیا ہے۔‘‘
حکام نے بتایا کہ بدھ کی صبح علاقے کو محاصرہ میں لیکر تلاشی کارروائی شروع کی گئی جس کے بعد ٹریفک کو بھی موڑ دیا گیا۔ معلوم ہوا ہے کہ سیکورٹی ایجنسیز کو علاقے میں عسکریت پسندوں کو چھپے ہونے کی اطلاع موصول ہوئی جس کے بعد علاقے کو محاصرے میں لے لیا گیا۔ ذرائع سے معلوم ہوا ہے کہ سیکورٹی فورسز کو علاقے کے میں مشتبہ نقل و حمل کی خفیہ اطلاع ملی جس کے بعد پولیس اور فوج کی مشترکہ ٹیم نے سرچ آپریشن شروع کر دیا۔
محاصرے کے دوران سیکورٹی فورسز اور عسکریت پسندوں کا آمنا سامنا نہیں ہوا تاہم سیکورٹی کو مزید سخت کر دیا گیا ہے۔ ادھر، وزیر اعظیم نریندر مودی کے دورہ کشمیر سے قبل وادی خصوصاً سرینگر میں سیکورٹی کو مزید سخت کر دیا گیا ہے۔ واضح رہے کہ وزیر اعظم 21جون کو عالمی یوگا ڈے کے سلسلے میں منعقد کی جا رہی ایک تقریب میں شرکت کی غرض سے سرینگر کا دورہ کر رہے ہیں ممکنہ طور پر وہ 20جون کی شام کو ہی سرینگر وارد ہو سکتے ہیں۔
یہ بھی پڑھیں: جموں کے مختلف علاقوں میں سرچ آپریشن - Jammu Search Operation
