پونچھ (جموں کشمیر): سرحدی ضلع پونچھ میں پولنگ اسٹیشن شاہ پور کے باہر ہفتہ کو دو گروپس میں تصادم کے بعد چار افراد زخمی ہو گئے۔ پولیس نے اس ضمن میں بیان جاری کرتے ہوئے کہا کہ ’’پولنگ بوتھ کے باہر کچھ افراد میں تلخ کلامی ہوئی، جو ہاتھاپائی تک جا پہنچی جس میں کچھ افراد کو معمولی چوٹیں آئیں۔‘‘ پولیس کا کہنا ہے کہ ’’اس واقعے کا انتخابات یا پولنگ مرکز کے ساتھ کوئی تعلق نہیں اور نہ ہی یہ واقعہ پولنگ بوتھ کے اندر یا احاطے میں پیش آیا ہے۔‘‘
واضح رہے کہ ہفتہ کو لوک سبھا انتخابات کے چھٹے مرحلے کے تحت اننت ناگ - راجوری پارلیمانی سیٹ پر انتخابات ہوئے اور خطہ پیچ پنچال کے پولنگ مراکز پر جنوبی کشمیر کی نسبت ووٹنگ کی شرح زیادہ رہی۔ اس دوران پونچھ میں شاہ پور نام کے علاقے میں قائم پولنگ مرکز کے باہر دو گروپس میں کسی بھی بات پر تیز کلامی شروع ہوئی اور ایک دوسرے کو مارنے پیٹنے لگے۔ یہ واقعہ ہفتہ قریباً ساڑھے بارہ بجے پیش آیا۔
زخمی ہوئے چاروں افراد کو فوری طور پر ضلع اسپتال پونچھ منتقل کیا گیا، جہاں ان کا علاج و معالجہ کیا گیا۔ زخمی ہونے والے افراد کی کی شناخت ظہور الدین (40) ولد محمد شریف، 20 سالہ شہزاد احمد ولد محمد یوسف، 18 سالہ سلیمہ بی زوجہ شہزاد احمد اور 22 سالہ محمد اسلم ولد محمد شریف ساکنان شاہ پور کے طور پر ہوئی ہے۔ ضلع اسپتال کی انتظامیہ تصدیق کرتے ہوئے کہا کہ ’’اسپتال میں مریضوں کو داخل کرایا گیا جن کا علاج و معالجہ جاری ہے تاہم سبھی افراد کی حالت مستحکم ہے۔‘‘ دریں اثنا، پولیس نے اس سلسلے میں ایک کیس درج کر لیا ہے اور تحقیقات شروع کر دی گئی ہے۔
یہ بھی پڑھیں: شوپیاں کے پولنگ مراکز پر لمبی قطاریں - Lok Sabha Election 2024
