پلوامہ: پلوامہ اسمبلی حلقہ سے الیکشن لڑنے والے آزاد امیدوار محمد اکبر صوفی نے اپنے آبائی گاؤں آریہال سے اپنی انتخابی مہم شروع کی۔ اس دوران انہوں نے اپنا منشور عام لوگوں تک پہنچایا۔ آزاد امیدوار محمد اکبر صوفی نے اپنے آبائی گاؤں آریہال میں روڈ شو کیا اور بعد میں اپنی رہائش گاہ پر لوگوں کے اجتماع سے خطاب کرتے ہوئے گاؤں کے لوگوں پر اپنا منشور واضح کیا۔
محمد اکبر صوفی نے کہا کہ ان کا منشور واضح طور پر جموں و کشمیر میں ایک مکمل سیاسی تبدیلی ہے کیونکہ گزشتہ کئی دہائیوں سے جموں و کشمیر پر حکمرانی کرنے والی سیاسی جماعتوں اور سیاست دانوں نے جموں و کشمیر کے معصوم لوگوں کو دھوکہ دیا۔ انہوں نے کہا کہ وہ وادی کے بے آواز لوگوں کو آواز دینا چاہتے ہیں۔ انہوں نے مزید کہا کہ عوام اسمبلی انتخابات میں نئے چہروں کی حمایت کریں اور یہ وقت کی اہم ضرورت ہے۔
آزاد امیدوار محمد اکبر صوفی کی حمایت کرنے والے سماجی سیاسی کارکن خورشید احمد ملک نے کہا کہ وادی کے لوگ ہر اس چیز سے واقف ہیں جو ماضی میں جموں و کشمیر پر حکومت کرنے والی پارٹیوں نے کیا۔ انہوں نے کہا کہ جموں و کشمیر کے لوگوں کو ایسے نئے چہروں کی حمایت کرنی چاہیے جن کے پاس اس نقطۂ نظر کو تبدیل کرنے کا ویژن ہے۔ جس سے جموں و کشمیر کے لوگ مشکلات کا شکار ہیں۔
