ترال( پلوامہ): موجودہ دور میں اگر کوئی پارٹی جموں وکشمیر کی سالمیت، تعمیر وترقی اور یہاں کے دبے ہوئے لوگوں کی آواز کو بلند کر سکتا ہے وہ صرف پیپلز ڈیموکریٹک پارٹی ہے اور اس لئے کشمیری عوام کو مجموعی طور پر پارلیمانی انتخابات میں اس پارٹی کے نامزد امیدواروں کو ووٹ ڈالنا چاہیے۔ان خیالات کا اظہار ترال سے پی ڈی پی کے یوتھ لیڈر ایڈوکیٹ ضیاء الرحمن نے ای ٹی وی بھارت کے ساتھ بات چیت کے دوران کیا۔
انہوں نے کہا کہ پی ڈی پی نے تمام تر مشکلات کے باوجود عوام کے حقوق کے تحفظ کے لیے جس طرح ایک چٹان کی طرح ڈٹی رہی، وہ اس بات کی غماز ہے کہ یہ پارٹی کھوکھلے نعروں کے بجائے عملی اقدامات کے حوالے سے سرگرم ہے اور اسی لیے انہوں نے بھی اس پارٹی کا ہاتھ تھاما ہے۔
ایڈوکیٹ ضیاء الرحمن نے بتایا کہ موجودہ دور میں جبکہ کشمیر میں قبرستان جیسی خاموشی ہے اور لوگ بات کرنے سے ڈر رہے ہیں، پی ڈی پی ان حالات میں عوامی آواز بنی ہوئی ہے اور اس لئے لوگوں کو اب کی بار پارلیمنٹ میں پی ڈی پی امیدواروں کو بھیجنا چاہیے، تاکہ عام لوگوں کی بات پارلیمنٹ میں اٹھائی جائے۔
مزید پڑھیں:
- کشمیری عوام مشکلات سے دوچار: وحید الرحمان پرہ
- دفعہ 370 کی منسوخی کے بعد پی ڈی پی سب سے بڑا ہدف بن گئی: محبوبہ مفتی
انہوں نے مزید بتایا کہ پارٹی صدر محبوبہ مفتی اور یوتھ صدر وحید الرحمان پرہ جو کہ جنوبی اور وسطی کشمیر سے پارٹی کے نامزد امیدوار ہیں، لوک سبھا انتخابات میں جیت درج کریں گے، کیونکہ یہ لیڈران زمینی سطح پر لوگوں کے ساتھ جڑے ہیں۔ایڈوکیٹ ضیاء نے ترال کے لوگوں سے اپیل کی کہ وہ ماضی کی طرح حق رائے دہی کے عمل سے دور نہ ہوں بلکہ اپنے ووٹ کا استعمال کریں، تاکہ ایک اچھا امیدوار منتخب ہو سکے۔
