بڈگام (جموں و کشمیر): پیپلز ڈیموکریٹک پارٹی (پی ڈی پی) کی رہنما محبوبہ مفتی نے بڈگام کے سوئیبگ میں ایک عوامی ریلی سے خطاب کرتے ہوئے کہا کہ ہم چاہتے ہیں کہ یہاں پر خوشحالی ہو ترقی ہو اور روزگار کے مواقعے پیدا ہوں۔ انہوں نے جموں و کشمیر سے متعلق کئی اہم سیاسی مسائل پر روشنی ڈالی جس میں خاص طور پر نوجوانوں کو بااختیار بنانے کی بات کہی گئی۔ محبوبہ مفتی نے اس سلسلے میں مقامی مفادات کے لیے اپنی پی ڈی پی کی وکالت پر توجہ مرکوز کی۔
محبوبہ مفتی نے کہا کہ مسلۂ کشمیر ایسا مسلۂ ہے کہ آپ چاہیں اس پر چاہیں کتنی بھی لیپا پوتی کریں، جب تک کانٹوں کی یہ تاریں ہمارے لوگوں کے ارد گرد بچھی ہیں تب تک مسلۂ کشمیر زندہ ہے اور اس کا حل نکالنا ضروری ہے اور سوئیبگ کی عوام اس بات کو زیادہ بہتر سمجھتی ہے۔
محبوبہ مفتی نے کہا کہ میں اپنے دور حکومت کے دوران نوجوانوں کے خلاف درج ایف آئی آر واپس لینے جیسے معاملات پر اپنے موقف کے بارے میں آواز اٹھاتی رہی ہوں اور اس کا موازنہ اپنے سیاسی مخالفین کے ریکارڈ سے کرتی ہوں۔ محبوبہ نے نوجوانوں کو تشدد سے دور رکھنے اور خطے میں ترقی کو فروغ دینے کے لیے اپنی پارٹی کے دیرینہ عزم کو بھی اجاگر کیا۔
یہ بھی پڑھیں:
محبوبہ مفتی کا خطاب جموں اور کشمیر کے اسمبلی انتخابات سے قبل مسلسل منعقد ہونے والی ریلیوں کی ایک بڑی سیریز کا حصہ ہے، چونکہ محبوبہ مفتی بذات خود ان انتخابات میں بحیثیت امیدوار نہیں ہیں لیکن وہ اپنی پارٹی کے امیدواروں کے لئے اسٹار کیمپینر کے طور پر لوگوں سے پی ڈی پی کو ووٹ دینے کی اپیل کر رہی ہے۔
