سرینگر (جموں و کشمیر): صوبہ جموں کے ریاسی ضلع میں واقع شیو کھوڑی مندر سے ماتا ویشنو دیوی مندر کی طرف جا رہے کم از کم نو (9) شردھالو اس وقت ہلاک ہو گئے جب ان کی مسافر بس، جس میں وہ سوار تھے، پر نامعلوم عسکریت پسندوں نے حملہ کیا۔ حملہ کے نتیجے میں گاڑی ڈرائیور کے قابو سے باہر ہوکر گہری کھائی میں جا گری۔ حادثہ میں 41افراد زخمی بھی ہو گئے جو اس وقت اسپتال میں زیر علاج ہیں۔
اس خوفناک حملہ میں ہلاک ہونے والوں میں دو بچے بھی شامل تھے۔ اس حملہ سے یاتریوں پر اسی طرح کے حملوں کی دل دہلا دینے والی یادیں تازہ ہو گئیں۔ ماضی میں جموں و کشمیر میں یاتریوں پر ہونے والے عسکری حملوں پر ایک طائرانہ نظر۔
کٹرا: 13 مئی 2022 کو ایک مشتبہ عسکریت پسندانی حملے کے بعد یاتریوں کو لے جانے والی بس میں آگ لگنے سے چار شردھالو ہلاک اور 24 زخمی ہو گئے۔ یہ واقعہ اس وقت پیش آیا جب ایک بس کٹرا، ماتا ویشنو دیوی مندر سے جموں کی طرف لوٹ رہی تھی۔ ابتدائی طور پر یہ خیال کیا جا رہا تھا کہ گاڑی میں کسی تکنیکی خرابی کی وجہ سے آگ لگی تھی لیکن بعد میں یہ بات سامنے آئی کہ اس واقعے کے پیچھے عسکریت پسندوں کی سازش تھی۔
اننت ناگ: جنوبی کشمیر کے اننت ناگ ضلع میں 10 جولائی 2017 کو ایک یاتری بس پر عسکری حملے میں 5 خواتین سمیت سات یاتری ہلاک جبکہ 19 زخمی ہو گئے۔ بس پر اس وقت حملہ ہوا جب اس میں سوار یاتری بالہ تال، گاندربل سے امرناتھ گپھا کے درشن کرکے واپس جموں لوٹ رہے تھے۔
گاندربل: راجستھان سے تعلق رکھنے والے پانچ یاتری اس وقت زخمی ہو گئے جب عسکریت پسندوں نے 21 جون 2006 کو امرناتھ یاتریوں کو بیس کیمپ سے سرینگر لے جانے والی بس پر دستی بم پھینکا۔ یہ حملہ وسطی کشمیر کے ضلع گاندربل میں بیہامہ-گندربل کے قریب ہوا۔ یہ حملہ جموں کشمیر پولیس کی جانب سے ایک عسکری ماڈیول کا پردہ فاش کرنے کے دعوے کے صرف چار روز بعد ہوا۔ یہ ب بس امرناتھ یاترا بیس کیمپ بالتل سے لوٹ رہی تھی اور اس میں 40 مسافر سوار تھے۔
سرینگر: 30 جولائی 2002 کو سرینگر میں یاتریوں کی ایک سیول ٹیکسی پر دستی بم پھینکا گیا جس میں دو یاتری ہلاک اور تین زخمی ہو گئے۔
پہلگام: چھ اگست 2002 کو عسکریت پسندوں کے ایک گروپ نے پہلگام کے قریب یاترا بیس کیمپ پر حملہ کیا جس میں یاتریوں سمیت 9 افراد ہلاک ہوگئے۔
