ترال: جموں وکشمیر اسمبلی انتخابات 2024 کے تحت گزشتہ روز پہلے مرحلے کے تحت ہوئی رائے دہی میں ترال حلقۂ انتخاب میں تقریباً تینتالیس فیصد ووٹنگ ہوئی۔ جس کے دوران ان ووٹروں نے قسمت آزمائی کرنے والے نو امیدواروں کی سیاسی قسمت کو ووٹنگ مشینوں میں بند کر دیا۔ ترال سے چناؤ لڑنے والے لیڈران نے عوام کے ساتھ ساتھ الیکشن کمیشن آف انڈیا اور ضلع انتظامیہ کا بھی شکریہ ادا کیا ہے۔
الائنس امیدوار سریندر سنگھ چنی نے بتایا کہ ترال سیٹ الائنس کے کھاتے میں ہوگی اور وہ ترال کی نمائندگی کے لیے بالکل تیار ہیں۔ جب کہ عوامی اتحاد پارٹی کے امیدوار ڈاکٹر ہربخش سنگھ نے کہا کہ ترال کے لوگوں نے جمہوریت کے لیے جو قدم بڑھایا ہے وہ ضرور ایک اچھے مستقبل کی ضمانت ہے۔ انہوں نے بھی اپنی جیت کا بھروسہ جتایا۔
یہ بھی پڑھیں:
پی ڈی پی کے رفیق احمد نائک نے جیت کا دعویٰ کرتے ہوئے بتایا کہ ترال میں 43 فیصد ووٹ ڈالنا اچھی بات ہے۔ کیونکہ اس وقت زمینداری کا سیزن عروج پر ہے۔ انہوں نے تمام ووٹرز کا شکریہ ادا کیا۔ ڈاکٹر غلام نبی بھٹ جو کہ بطور آزاد الیکشن لڑ رہے تھے، نے میڈیا کو بتایا کہ وہ یہ چناؤ جیت رہے ہیں اور اس حوالے سے وہ ووٹروں کے شکر گزار ہیں۔
