ترال : محکمہ بجلی کی جانب سے آج پی ایم سوریہ گھر بجلی یوجنا کی جانب سے ٹاون ہال ترال میں ایک آگاہی پروگرام منعقد ہوا جس میں محکمہ بجلی کے عہدیداروں کے علاوہ عام لوگوں نے شمولیت کی۔ اس موقع پر محکمہ بجلی کے اے ای شبیر احمد آہنگر، اے ای محمد ایوب اور دیگر آفیسر وں نے اس اسکیم کے اغراض و مقاصد بیان کیے اور کہا کہ اس اسکیم کا آغاز وزیر اعظم نریندر مودی نے 15 جنوری کو گزشتہ برس کیا تھا۔ اس اسکیم سے گھروں کی چھتوں پر شمسی تنصیبات کے ذریعے پہلے ہی 8.46 لاکھ گھرانوں کو فائدہ پہنچایا گیا ہے۔
شمسی توانائی کو تیزی سے اپنانے کی پیش رفت ماہانہ تنصیب کی شرحوں میں دس گنا اضافے سے ظاہر ہوتی ہے، جو اب ماہانہ تقریبا 70,000 تنصیبات سے تجاوز کرچکی ہے ، جو اسکیم سے پہلے کی سطحوں کو نمایاں طور پر پیچھے چھوڑ رہا ہے۔ اس اسکیم میں قابل تجدید توانائی کو مزید سستی اور قابل رسائی بنانے کے لیے 40فیصد تک کی سبسڈی پیش کی جاتی ہے۔ اب تک 5.54 لاکھ مکین صارفین کو مرکزی مالی امداد (سی ایف اے) کے طور پر 4,308.66 کروڑ روپے تقسیم کیے گئے ہیں، جس میں فی گھرانہ 77,800 روپے کی اوسط سبسڈی شامل ہے۔
مزید برآں ، ایک اندازے کے مطابق 45فیصد مستفیدین کو اب صفر بجلی کے بل موصول ہور رہے ہیں، جو ان کی شمسی توانائی کی پیداوار اور کھپت کے پیٹرن پر منحصر ہے۔ میڈیا سے بات کرتے ہوئے شبیر احمد آہنگر نے بتایا کہ اس اسکیم کے دوران صارفین کو سبسڈی ایک مہینے کے اندر اندر واگزار ہوگی۔ اس حوالے سے عوامی سطح پر بھی سپورٹ مل رہا ہے اور لوگ اسکیم کا فائدہ اٹھانے کی کوشش کر رہے ہیں۔
