بارہمولہ: شمالی کشمیر کے ضلع بارہمولہ میں لائن آف کنٹرول (ایل او سی) کے نزدیک گلمرگ کے نگی، بوٹاپتھری علاقے میں عسکریت پسندوں نے فوجی گاڑی پر حملہ کیا، جس کے نتیجے میں دو فوجی اور دو سول پورٹرز ہلاک ہو گئے، حملہ میں تین دیگر زخمی ہوئے ہیں۔ حملے کے فوراً بعد سیکورٹی فورسز نے بڑے پیمانے پر علاقے کا محاصرہ کر کے سرچ آپریشن شروع کر دیا ہے۔
فوجی حکام کے مطابق 18 راشٹریہ رائفلز کی ایک گاڑی پر یہ حملہ کیا گیا جو بوٹاپتھری نامی علاقے سے گزر رہی تھی۔ ابتدائی اطلاعات میں بتایا گیا کہ حملے میں چار سے پانچ فوجی اور کچھ پورٹر زخمی ہوئے، تاہم بعد میں دو فوجی اور دو پورٹر زخموں کی تاب نہ لاتے ہوئے چل بسے۔ زخمیوں میں تین فوجی اور ایک پورٹر شامل ہیں جن کا علاج اسپتال میں جاری ہے۔
مرنے والے پورٹرز کی شناخت نوشہرہ، بونیار علاقے کے مشتاق احمد چودھری اور برنیٹ بونیار کے ظہور احمد میر کے طور پر کی گئی ہے۔ دونوں پورٹرز ضلع بارہمولہ کے رہائشی ہیں۔ جبکہ ہلاک ہونے والے فوجیوں میں جیون سنگھ اور قیصر احمد شاہ شامل ہیں۔ ایک فوجی افسر نے حملہ کی تفصیلات فراہم کرتے ہوئے بتایا: ’’حملے کے دوران علاقے میں چھپے دہشتر گردوں نے فوجی گاڑی کو نشانہ بنایا اور یہ بھی کہا جا سکتا ہے کہ یہ حملہ دراندازی کی کوشش کا حصہ ہو سکتا ہے۔‘‘ اس عسکری حملے کے بعد اعلیٰ سیکیورٹی حکام بھی آپریشن کی نگرانی کر رہے ہیں۔
حملے کے فوراً بعد سیکورٹی فورسز نے اضافی کمک تعینات کر کے علاقے کو محاصرے میں لے لیا ہے، جبکہ ڈرون اور ہیلی کاپٹر بھی تلاشی کارروائی میں شامل کیے گئے ہیں اور ناکے بھی سخت کر دیے گئے ہیں۔ بارہمولہ پولیس نے ایک بیان میں حملے کی تصدیق کرتے ہوئے کہا کہ: ’’بارہمولہ کے بوٹاپتھری سیکٹر میں نگی پوسٹ کے قریب فورسز اور دہشتگردوں کے درمیان فائرنگ کا تبادلہ ہوا۔ مزید تفصیلات حقائق کی تصدیق کے بعد دی جائیں گی۔‘‘
بوٹا پتھری، گلمرگ میں حملہ اس واقعے کے چند گھنٹوں بعد پیش آیا جس میں ریاست اتر پردیش سے تعلق رکھنے والا ایک مزدور - پریتم سنگھ - جنوبی کشمیر کے ضلع پلوامہ کے ترال علاقے میں زخمی حالت میں ملا تھا۔ اس واقعے میں ابھی تک عسکریت پسندوں کے ملوث ہونے کی تصدیق نہیں ہوئی ہے۔ جبکہ اتوار کی شام کو زیڈ موڑ، ٹنل پروجیکٹ کے مزدوروں کے کیمپ پر حملے کے نتیجے میں چھ مزدور اور ایک ڈاکٹر ہلاک ہوئے۔ اس حملے کے بعد سیکیورٹی فورسز نے کشمیر میں متعدد چھاپوں کے دوران ایک نو تشکیل شدہ عسکری گروپ، تحریک لبیک یا مسلم (ٹی ایل وائی ایم)، کو تباہ کرنے کا دعویٰ کیا تھا۔
یہ بھی پڑھیں: جموں وکشمیر میں غیر مقامی مزدور پر ایک اور حملہ، عسکریت پسندوں کی فائرنگ میں یوپی کا رہائشی زخمی
