سرینگر: جموں سے کشمیر آنے والے امرناتھ یاترا کے قافلوں کے دوران سرینگر جموں شاہراہ عام ٹریفک کو بند کرنے پر سابق رکن اسمبلی اور سی پی آئی ایم لیڑر یوسف تاریگامی نے لیفٹینٹ گورنر منوج سنہا سے مطالبہ کیا کہ وہ اس قدم کا جائزہ لے۔ تاریگامی نے بتایا کہ یاترا کے قافلوں کے دوران ٹریفک کی نقل و حمل کو روکنے سے لوگوں کو گونا گوں مشکلات کا سامنا کرنا پڑتا ہے اور لوگوں کو گھنٹوں ٹریفک میں بند رکھنے سے انکا قیمتی وقت ضائع ہورہا ہے۔
انہوں نے کہا کہ اگرچہ یاتریوں کی سلامتی اور حفاظت کرنا انتظامیہ کی اہم ذمہ داری ہے جس کے ساتھ کوئی سمجھوتہ نہیں کیا جانا چاہئے لیکن عام ٹریفک کو ہاوئے پر درماندنہ رکھنے سے لوگوں کو مشکلات پیش آرہے ہیں۔ غور طلب ہے کہ جموں سے روزانہ 250 سے زائد گاڑیوں کے قافلے میں سینکڑوں یاتری کشمیر کی طرف روانہ ہوتے ہیں۔ اس قافلے کے دوران سرینگر جموں شاہراہ پر عام ٹریفک کی نقل و حمل کو بند کیا جارہا ہے۔ یہ مشق فروری سنہ 2019 میں ہاوئے پر پلوامہ خودکش حملے کے بعد شروع کی گئی۔ سی آر پی ایف نے اس کا اطلاق سیکورٹی فورسز کے قافلوں کے گزرنے کے لئے کیا تھا تاہم بعد میں امرناتھ یاترا کے دوران اس کو جاری رکھا۔
واضح رہے 52 روز پر محیط شری امرناتھ یاترا 29 جون سے شروع ہوئی اور 19 اگست کو اس لا آخری دن ہوگا۔ یاترا کے لئے جموں کشمیر انتظامیہ نے سخت سیکورٹی انتظامات کئے ہیں۔
