آج عیدمیلاد النبی صلی اللہ علیہ وسلم کے موقع پر بعد نماز ظہر ضلع پلوامہ میں حاجی سید حسن سمنانی پتی پورہ کے آستانہ پر ہزاروں کی تعداد میں عقیدت مندوں نے حضور اکرم صلی اللہ علیہ وسلم اور حضرت فاروق اعظم رضی اللہ عنہ کے مقدس آثار مبارک دیکھنے کے لیے جمع ہوئے تھے۔ وادی کے مختلف علاقوں سے آئے ہوئے عقیدت مندوں کی بڑی تعداد جن میں مرد، خواتین اور بچے بھی شامل ہیں نے مقدس آثار مبارک کا دیدار کیا۔
اس موقع پر اوقات کمٹی پتی پورہ نے زائرین کے لئے کھانے پینے اور رات بھر قیام کرنے کے انتظامات کئے تھے وہیں انتظامیہ کی جانب سے انتظامات کئے گئے تھے جس کے لئے اوقات کمٹی پتی پورہ نے انتظامیہ کا شکریہ ادا کیا۔
اس موقعے پر پتی پورہ جامع مسجد کے امام و خطیب سمیع اللہ صوفی نے بات کرتے ہوئے کہا کہ آقائے دو جہاں حضور رحمت عالم ﷺ سبھی کے لئے رحمت للعالمین ہیں۔
مزید پڑھیں: عید میلاد النبی پر شاہ اسلامک لائبریری میں عظیم الشان سیرت کانفرنس و محفل نعت کا انعقاد
انہوں نے مزید کہا کہ آقائے دو جہاں حضور رحمت عالم ﷺ کی تعلمیات پر ہم سب کو عمل کرنے کی ضرورت ہے تاکہ ہمارے دونوں جہاں آباد رہیں۔ اسی کے ساتھ انہوں نے مذکورہ آستانے پر موجود دونوں تبرکات کی اہمیت کے بارے میں بتاتے ہوئے کہا کہ ان تبرکات سے ہزاروں لوگ فیضیاب ہوئے۔
