اننت ناگ: نیشنل کانفرنس کے نائب صدر عمر عبداللہ نے کہا ہے کہ کانگریس کے ساتھ چند سیٹوں پر اتفاق رائے ہونا باقی ہے جس پر مذاکرات ابھی جاری ہیں، سیٹوں کی تقسیم کی تجویز کو حتمی شکل دینے کے لیے آج تبادلۂ خیال ہوگا۔ نیشنل کانفرنس کے صدر ڈاکٹر فاروق عبداللہ کی جانب سے جموں و کشمیر اسمبلی انتخابات کے لیے کانگریس کے ساتھ اتحاد کے اعلان کے ایک دن بعد، پارٹی کے نائب صدر عمر عبداللہ نے جمعہ کو کہا کہ اکثریتی نشستوں پر اتحاد کو حتمی شکل دے دی گئی ہے۔ جب کہ کچھ نشستوں پر اتفاق رائے ہونا ابھی باقی ہے۔
عمر نے مزید کہا کہ سیٹ شیئرنگ کے حوالے سے این سی اور کانگریس کے رہنماؤں کے درمیان چند سیٹوں پر ابھی اتفاق نہیں ہوا ہے لیکن اکثر سیٹوں کو حتمی شکل دے دی گئی ہے۔ انہوں نے کہا، کچھ سیٹوں پر، دونوں پارٹیاں پھنس گئی ہیں، تاہم اتحاد کو حتمی شکل دینے کے لیے اس معاملے پر بات چیت کرنے کے لیے آج پھر ایک میٹنگ ہوگی۔
عمر عبداللہ نے کہا کہ پارٹی امیدواروں کی فہرست 27 اگست سے پہلے منظر عام پر لائی جائے گی اور این سی نے آج کولگام سے کاغذات نامزدگی داخل کرنے کی شروعات کردی ہے، انہوں نے کہا کہ این سی ایک منظم منشور لے کر آئی ہے۔ ہمیں امید ہے کہ عوام این سی کو خدمت کرنے کا موقع دیں گے۔ واضح رہے کہ عمر عبداللہ کولگام کے دورے پر تھے جہاں پر سکینہ ایتو نے عمر عبداللہ کے ہمراہ کاغذاتِ نامزدگی داخل کیے۔
یہ بھی پڑھیں:
