ترال، پلوامہ: مہاتما گاندھی نے اپنے آس پاس کے افراد کو صفائی برقرار رکھنے کے بارے میں تعلیم فراہم کرکے اقوام عالم کو ایک بہترین پیغام دیا تھا۔ انہوں نے کلین انڈیا کا خواب دیکھا تھا جس کے لیے وہ چاہتے تھے کہ بھارت کے تمام شہری ملک کو صاف ستھرا بنانے کے لیے مل کر کام کریں۔ اسی کے مدنظر ترال میں بھی ایک سوچھتا ابھیان کے تحت مہم چلائی گئی۔ اور 'گاندھی جینتی' کے پیش نظر، ڈائریکٹر اربن لوکل باڈیز کشمیر، اکرام اللہ ٹاک نے آج ترال کا دورہ کیا۔
اس موقع پر ڈائریکٹر اربن لوکل باڈیز کشمیر، اکرام اللہ ٹاک نے مہاتما گاندھی کے اعزاز میں سوچھتا ہی سیوا ہے کے تحت منائے جانے والے "سوچھ بھارت دیوس" کا جائزہ لیا۔ اس موقع پر ڈائریکٹر نے میونسپل کمیٹی ترال کے کارکنوں کے ساتھ صفائی مہم میں حصہ لیا، جب کہ انہوں نے نئی بستی کے علاقے میں ڈمپنگ سائٹ پر موجود سہولیات کا جائزہ بھی لیا۔
یہ بھی پڑھیں: |
اس کے علاوہ انہوں نے میونسپل کمیٹی ترال کے صفائی کرمچاریوں کے ساتھ بھی بات چیت کی اور ان کے مطالبات سنے اور ان پر ہمدردانہ غور کرنے کی یقین دہانی کرائی۔ میڈیا کے ساتھ بات کرتے ہوئے بلدیہ کے ڈائریکٹر اکرام اللہ ٹاک نے بتایا کہ وادی کے دیگر علاقوں کی طرح ترال میں بھی سالڈ ویسٹ مینجمنٹ کے حوالے سے منصوبہ عمل میں لایا جا رہا ہے تاکہ فضلے کو ٹھکانہ لگایا جا سکے۔ انہوں نے مزید بتایا کہ ترال میں قصبے کی خوبصورتی کو نکھارنے کے لیے جلد ہی ایک کلاک ٹاور بھی بنایا جائے گا۔
