سرینگر: جموں وکشمیر پولیس نے مرکزی وزیر داخلہ امت شاہ کے ایک مبینہ ترمیم شدہ ویڈیو کے حوالے سے ایک کیس درج کیا ہے۔دراصل یہ شکایت بی جے پی لیڈر الطاف ٹھاکر نے وزیر داخلہ کا ویڈیو اپ لوڈ کرنے پر ایک سوشل میڈیا صارف کے خلاف درج کی تھی۔
اطلاعات کے مطابق بھارتیہ جنتا پارٹی کے سینیئر لیڈر الطاف ٹھاکر نے وزیر داخلہ امت شاہ کے ایک مبینہ ایڈٹ شدہ ویڈیو کو اپ لوڈ کرنے پر سوشل میڈیا صارف کے خلاف پولیس میں شکایت درج کرائی ہے۔
الطاف ٹھاکر نے شکایت میں لکھا:’الیاس میر ماگامی کے نام سے ایک شرپسند شخص نے مرکزی وزیر داخلہ امت شاہ کا ایک ڈب شدہ اور فرضی ویڈیو اپ لوڈ کیا ہے، جس میں کہا گیا ہے کہ مرکزی سرکار جموں وکشمیر میں ایس سی اور ایس ٹی ذمروں سے تعلق رکھنے والے کنبوں کی ریزرویشن منسوخ کرنے جارہی ہے جو سراسر بے بنیاد اور حقیقت سے کوسوں دور ہے۔‘
بی جے پی لیڈر نے پولیس سے درخواست کی کہ مذکورہ شخص کے خلاف فوری کارروائی عمل میں لا کر اس سے سلاخوں کے پیچھے دھکیل دیا جائے،کیونکہ اس عمل سے جموں وکشمیر کی ایس سی اور ایس ٹی برادری کی ناراضگی اور احتجاج کا امکان ہے۔
بی جے پی لیڈر کی شکایت کے بعد ماگام پولیس نے اس ضمن میں 505(2),171Gکے تحت کیس درج کرکے تحقیقات شروع کی ہے۔
