اسلام آباد: شہباز شریف نے پیر کو پاکستان کے 24ویں وزیر اعظم کے طور پر حلف اٹھایا، انہوں نے 2022 کے بعد دوسری مرتبہ معاشی بحران کا شکار پاکستان کی باگ ڈور سنبھالی ہے۔ ایوانِ صدر میں منعقدہ تقریب میں صدر مملکت عارف علوی نے نومنتخب وزیراعظم شہباز شریف سے حلف لیا۔
حلف برادری تقریب میں آرمی چیف جنرل عاصم منیر اور ان کے اتحادی پارٹی کے رہنماوں سمیت دیگر سیاسی رہنماوں نے شرکت کی۔ گزشتہ روز پاکستانی قانون سازوں نے گزشتہ ماہ ہونے والے متنازعہ انتخابات کے بعد شہباز شریف کو دوسری بار ملک کا وزیراعظم منتخب کیا تھا۔ جہاں چھ پارٹیوں کے اتحادی لیڈر اور مسلم لیگ نون کے صدر شہباز شریف نے 201 ووٹ حاصل کیے جبکہ پاکستان تحریک انصاف کی حمایت یافتہ آزاد امیدوار کے لیڈر عمر ایوب نے 92 ووٹ حاصل کیے۔
وزیراعظم منتخب ہونے کے بعد شہباز شریف نے اپنے پہلے خطاب میں مسئلہ کشمیر کو اٹھایا اور ملک کے پڑوسیوں سمیت تمام سرکردہ ممالک کے ساتھ تعلقات کو بہتر بنانے کا عہد بھی کیا۔ شہباز شریف نے کہا کہ پاکستان کسی ’’گریٹ گیم‘‘ کا حصہ نہیں بنے گا اور ان کی حکومت دوستوں کی تعداد میں اضافہ کرے گی۔ انہوں نے ہمسایہ ممالک سمیت تمام سرکردہ ممالک کے ساتھ تعلقات استوار کرنے اور بہتر بنانے کا عہد کیا۔
یہ بھی پڑھیں
شہباز شریف دوسری مدت کے لیے پاکستان کے وزیراعظم منتخب
پاکستان کے نو منتخب وزیر اعظم شہباز شریف نے اپنی پہلی ہی تقریر میں مسئلہ کشمیر پر کیا کہا؟
