نئی دہلی: پاکستان نے مہاراجہ رنجیت سنگھ کی برسی میں شرکت کے لیے بھارت سے آنے والے 509 سکھ یاتریوں کے لیے ویزے جاری کیے ہیں۔ برسی سے متعلق پروگرام پاکستان میں 21 سے 30 جون تک منعقد ہوں گے۔
بھارت میں پاکستانی ہائی کمیشن نے ایک پریس ریلیز میں کہا، "مہاراجہ رنجیت سنگھ کی برسی کے موقع پر، نئی دہلی میں پاکستانی ہائی کمیشن نے بھارت سے آنے والے سکھ یاتریوں کو سالانہ برسی میں شرکت کے لیے 509 ویزے جاری کیے ہیں۔
مہاراجہ رنجیت سنگھ 19ویں صدی میں سکھ سلطنت کے پہلے بادشاہ تھے۔ وہ 'شیرِ پنجاب' کے نام سے بھی مشہور ہیں۔
پاکستان کے ناظم الامور سعد احمد وڑائچ نے سکھ یاتریوں کو دلی مبارکباد پیش کرتے ہوئے انھیں ہر ممکن سہولت فراہم کرنے کے لیے پاکستان کے مسلسل عزم پر زور دیا۔
واضح رہے کہ ان ویزوں کا اجراء مذہبی عبادت گاہوں کی زیارت کے پیش نظر پاک بھارت پروٹوکول، 1974 کے فریم ورک کے تحت کیا جاتا ہے۔ ہر سال بھارتی زائرین کی ایک بڑی تعداد مختلف مذہبی تہواروں اور مواقع پر پاکستان کا رخ کرتی ہے۔
اس ماہ کے شروع میں پاکستان نے گرو ارجن دیو کے 'یوم شہادت' کے موقع پر منعقد ہونے والے سالانہ تہوار میں شرکت کے لیے بھارت سے آنے والے 962 سکھ یاتریوں کے ویزے جاری کیے تھے۔ ایک سرکاری پریس ریلیز کے مطابق، یہ تہوار پاکستان میں 8 سے 17 جون تک منایا جائے گا۔
اس کے علاوہ 13 اپریل سے 22 اپریل تک پاکستان میں ہونے والے سالانہ بیساکھی تہوار میں شرکت کے لیے پاکستان نے بھارت سے آنے والے 2,843 سکھ یاتریوں کو ویزے جاری کیے تھے۔
