پشاور: منگل کے روز ایک پاکستانی صحافی خلیل جبران کو شورش زدہ صوبہ خیبر پختونخواہ میں نامعلوم مسلح افراد نے گولی مار کر ہلاک کر دیا۔ خلیل جبران پشتو نیوز چینل 'خیبر نیوز' سے وابستہ تھے۔حملہ آور صحافی کو قتل کرنے کے بعد موقع سے فرار ہونے میں کامیاب ہو گئے۔
ڈسٹرکٹ پولیس آفیسر (ڈی پی او) خیبر سلیم عباس کے مطابق صحافی جبران کو موٹر سائیکل پر سوار نامعلوم مسلح حملہ آوروں نے اس وقت نشانہ بنایا جب وہ اپنے دوست سجاد ایڈووکیٹ کے ساتھ اپنے گھر کی طرف جارہے تھے۔ صحافی کی گاڑی کو مسلح افراد نے گھیرنے کے بعد انھیں گاڑی سے باہر نکال کر ان پر فائرنگ کردی۔ جس کی وجہ سے وہ موقع پر ہی جاں بحق اور ان کا ساتھی سجاد زخمی ہوگیا۔
یہ واقعہ ضلع خیبر کے علاقے مزرینہ سلطان خیل میں پیش آیا۔ اس قبائلی ضلع کے علاقہ مزرینہ کو عسکریت پسندوں کا گڑھ سمجھا جاتا ہے۔ وزیراعلیٰ خیبرپختونخوا علی امین گنڈا پور نے سینیئر صحافی کے قتل کی مذمت کرتے ہوئے ملوث افراد کی فوری گرفتاری کا حکم بھی دے دیا ہے۔
ڈی پی او نے یہ بھی دعویٰ کیا کہ جبران کو دہشت گردوں کی جانب سے دھمکیاں بھی موصول ہوئی تھیں۔ ایک بیان میں، ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (AEMEND) نے قتل کی مذمت کرتے ہوئے حملہ آور کی گرفتاری کا مطالبہ کیا ہے اور ایسے واقعات کو روکنے میں اعلیٰ حکام کی ناکامی پر تنقید بھی کی۔
