غزہ: غزہ جنگ کو 9 مہینے مکمل ہو گئے۔ اس موقع پر فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ کا ایک ویڈیو منظر عام پر آیا ہے۔ اس ویڈیو میں ابو عبیدہ نے ایک بیان جاری کیا ہے۔
القسام بریگیڈز کے ترجمان کے جاری کردہ اس ویڈیو میں دعویٰ کیا گیا ہے کہ حماس کا عسکری وونگ مضبوطی کے ساتھ صیہونی فوج کا مقابلہ کر رہا ہے۔ ویڈیو بیان میں ابو عبیدہ نے دعویٰ کیا ہے کہ ان کے جنگجو ہر محاذپر دشمن کو نقصان پہنچا رہے ہیں۔
ویڈیو بیان میں ابو عبیدہ نے پھر دہرایا کہ معرکہ طوفان الاقصیٰ صیہونی مظالم کا ردعمل ہے۔
فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ نے کہا کہ مغربی کنارے، القدس اور غزہ کی پٹی میں اسرائیلی قابض افواج کے مظالم اپنی انتہا کو پہنچ چکے ہیں، وہ شہریوں کو انسانی ڈھال بنا کر استعمال کررہی ہے اور اسپتالوں، اسکولوں، مساجد اور گرجا گھروں کو نشانہ بنا رہی ہے۔
ابو عبیدہ نے مزید کہا کہ، فلسطینی مزاحمت کار تنظیم گزشتہ 9 مہینوں سے کسی بھی بیرونی مدد کے بغیر ایسے دشمن کا مقابلہ کررہے ہیں جسے امریکہ اور برطانیہ کی حمایت حاصل ہے۔
ابوعبیدہ نے کہا کہ القسام بریگیڈز کی تمام 24 بریگیڈز اور دیگر تمام مزاحمتی گروہ دشمن کا مقابلہ کررہے ہیں اور پورے غزہ میں دشمن کو نقصان پہنچارہے ہیں۔
القسام بریگیڈز کے ترجمان نے دعویٰ کیا کہ عسکری ونگ کی قوت مضبوط ہے اور جنگ کے دوران بھی ہزاروں مزاحمت کار اس میں شامل ہوئے ہیں۔
خیال رہے کہ غزہ کی وزارت صحت کے مطابق گزشتہ نو مہینوں سے جاری اسرائیلی جارحیت میں اب تک کم از کم 38 ہزار سے زائد فلسطینی جاں بحق ہوئے ہیں جن میں خواتین اور بچوں کی زیادہ تعداد ہے۔ اس کے مطابق سات اکتوبر 2023 سے اب تک اسرائیلی حملوں میں 87 ہزار 828 افراد زخمی ہوئے ہیں جبکہ 10 ہزار افراد لاپتہ ہیں۔
یہ بھی پڑھیں:
