یروشلم: مسجد اقصیٰ میں مقدس مہینے رمضان کی پہلی نماز جمعہ سخت اسرائیلی پابندیوں کے باوجود بغیر کسی تشدد کے گزر گئی۔ اس بات کا خدشہ ظاہر کیا جا رہا تھا کہ غزہ میں اسرائیل اور حماس کی جاری جنگ یروشلم کے پرانے شہر میں جھڑپوں کو جنم دے گی۔
حماس کے عسکریت پسندوں نے فلسطینیوں سے اپیل کی ہے کہ وہ اٹھیں اور اس مقام پر داخلے پر سخت اسرائیلی پابندیوں کو چیلنج کریں۔ نماز جمعہ کے بعد کوئی تشدد نہیں بھڑکا۔ مسجد اقصیٰ کے انتظامات کرنے والے اردن میں مقیم مسلم مذہبی ادارے وقف کے مطابق کم از کم 80,000 نمازیوں نے نماز میں شرکت کی، جو کہ پیر کو رمضان شروع ہونے کے بعد سب سے زیادہ ٹرن آؤٹ ہے۔
تقریباً تمام نمازی مسلح اسرائیلی پولیس کے پہرے والے کمپاؤنڈ کے دروازے عبور کرتے ہوئے پرامن طور پر پرانے شہر کی گلیوں سے گزر۔
گزشتہ برسوں کے دوران، رمضان کے دوران کمپاؤنڈ میں ہونے والی جھڑپوں نے اسرائیل-فلسطینی تنازعہ میں بڑی شدت پیدا کی ہے، جس میں مسجد پر اسرائیلی حملے اور حماس کے راکٹ فائر شامل ہیں، جو 2021 میں اسرائیل اور حماس کے درمیان جنگ کی وجہ بنا تھا۔
مغربی کنارے کے فلسطینیوں کی شہر تک رسائی 55 سال سے زیادہ عمر کے مردوں، 50 سال سے زیادہ عمر کی خواتین اور 10 سال سے کم عمر کے بچوں تک محدود تھی، تمام زائرین کو اسی دن علاقے میں واپس آنا تھا۔ اسرائیل نے تمام زائرین سے موبائل ایپلیکیشن کے ذریعے خصوصی اجازت نامہ حاصل کرنے کا مطالبہ بھی کیا تھا۔ پچھلے سالوں میں، خواتین پر عمر کی کوئی پابندی نہیں تھی اور بزرگ نمازیوں کو آن لائن پرمٹ کے لیے درخواست دینے کی ضرورت بھی نہیں تھی۔
یروشلم اور مغربی کنارے کے شہر رام اللہ کے درمیان واقع قلندیہ چیک پوائنٹ پر ایسوسی ایٹڈ پریس نے کم از کم تین بزرگ مردوں سے بات کی جنہوں نے کہا کہ انہیں اجازت نامہ نہ ہونے کی وجہ سے واپس کر دیا گیا۔
یہ بھی پڑھیں:
