ممبئی: بالی ووڈ اداکارہ زینت امان نے بائیوپک کی خواہش ظاہر کی ہے۔ زینت امان سوشل میڈیا پر مداحوں کو مسلسل اپنی اپ ڈیٹس دیتی رہی ہیں۔ زینت امان نے انسٹاگرام پر اپنی ایک پرانی تصویر شیئر کی اور اسی کے ساتھ ایک پیغام بھی لکھا، اس میں انہوں نے اپنی بائیوپک بنانے کی خواہش کا اظہار کیا ہے۔
زینت امان نے کیپشن میں لکھا کہ ہوسکتا ہے کہ آپ اسے ایک بوڑھی خاتون کی شکایت کہہ کر مسترد کر دیں، لیکن میرے خیال میں مجھے شامل کیے بغیر میرے بارے میں بائیوپک بنانا بے وقوفی ہوگی۔ بالکل واضح طورپر، مجھے کوئی بھی اس طرح نہیں جانتا جس طرح میں جانتی ہوں۔
لہٰذا اس سلسلے میں کوئی بھی تحقیق میرے ان پٹ کے بغیر نامکمل، حتیٰ کہ ناقص بھی ہوگی۔ میں شرط لگاتی ہوں کہ میرے بارے میں پبلک ڈومین میں دستیاب ہر ایک حقیقت کے لیے مزید سینکڑوں حقائق ہیں جو صرف مجھے معلوم ہیں۔ بہت سارے سنگ میل، کہانیاں، اور ذاتی انکشافات ہیں جو میرے سفر کو سمجھنے کے لیے لازمی ہیں۔ یہ واقعی ایک دلچسپ زندگی رہی ہے۔
یہ بھی پڑھیں:
- شاق: دی ڈاؤٹ فلم میں زینت امان کا کردار ادا کریں گی پائل گھوش
- زینت امان نے انسٹاگرام پر قدم رکھا، کہا 70 کی دہائی میں مردوں کا غلبہ تھا
زینت امان نے مزید لکھا کہ میں نے ممکنہ بائیوپک کے بارے میں بات کی ہے اور میں خود بھی آہستہ آہستہ اس آئیڈیا پر غور کر رہی ہوں۔ کیا ایسا ہو گا؟ کسے پتا؟ میری بائیوپک کے لئے ایک حساس ہدایت کار، ایک بہادر مصنف، ایک معصوم فنکار کی ضرورت ہوگی...! (یو این آئی)
