حیدرآباد (نیوز ڈیسک): اداکارہ تمنّا بھاٹیہ کو مہاراشٹر سائبر ونگ نے ’’مہادیو بیٹنگ ایپ‘‘ کی دوسری ایپ ’’فیئر پلے ایپ‘‘ پر آئی پی ایل 2023 کی غیر قانونی اسٹریمنگ کے سلسلے میں پوچھ گچھ کے لیے طلب کیا ہے۔ بھاٹیہ کو 29 اپریل کو پوچھ گچھ کے لیے سائبر سیل کے سامنے پیش ہونے کے لیے طلب کیا گیا ہے۔ اطلاعات کے مطابق ایپ کے سلسلے میں تمنّا کا نام سامنے آنے کے بعد پولیس اس معاملے میں تمنّا کے کردار کو واضح کرنے کی کوشش کر رہی ہے۔
یہ بھی بتایا گیا ہے کہ اس کیس کے سلسلے میں سنجے دت کا نام سامنے آیا ہے۔ انہیں اس ہفتے کے شروع میں پوچھ گچھ کے لیے پیش ہونے کے لیے بلایا گیا تھا۔ تاہم اپنے شیڈول کی وجہ سے وہ پہنچنے سے قاصر رہے اور انہوں نے نئی تاریخ کی درخواست کی ہے۔ ایک بیان میں کہا گیا ہے کہ اس کے بجائے انہوں نے اپنا بیان ریکارڈ کرنے کے لیے تاریخ اور وقت مانگا تھا اور کہا تھا کہ وہ اس تاریخ کو بھارت میں نہیں تھے۔ بھاٹیہ کے بارے میں بات کرتے ہوئے بیان میں مزید کہا گیا ہے "اسے 29 اپریل کو مہاراشٹر سائبر سیل کے سامنے پیش ہونے کو کہا گیا ہے۔"
سال 2023 میں ایک براڈکاسٹر نے یہ الزام عائد کرتے ہوئے مقدمہ دائر کیا کہ آئی پی ایل کے کچھ میچوں کو ایپ پر غیر قانونی طور پر اسٹریم کیا گیا تھا۔ غیر مجاز اسٹریمنگ کیس کی تحقیقات ستمبر 2023 میں شروع ہوئی جب نیٹ ورک نے شکایت درج کرتے ہوئے کہا کہ ’’سافٹ ویئر نے ان کے انٹلیکچول پراپرٹی رائٹس (حقوق) کی خلاف ورزی کی ہے۔‘‘ نیٹ ورک کے میچوں کو اسٹریم کرنے کے خصوصی حقوق حاصل کرنے کے باوجود ایپ مبینہ طور پر انہیں "غیر قانونی طور پر" اسٹریم کر رہی تھی جس کے نتیجے میں مبینہ طور پر 100 کروڑ روپے سے زیادہ کا نقصان ہوا ہے۔
ایف آئی آر درج کیے جانے کے بعد بادشاہ ، جیکولین فرنانڈیز، تمنّا بھاٹیہ اور سنجے دت سمیت بی ٹاؤن کی متعدد معروف شخصیات کو پوچھ گچھ کے لیے طلب کیا گیا ہے۔ مہاراشٹر سائبر سیل اس سے قبل اس معاملے میں گلوکار بادشاہ کے علاوہ سنجے دت اور جیکولین فرنانڈیز کے منیجرز سے گواہی لے چکا ہے۔ انکوائری نے دسمبر 2023 میں اس وقت ایک ڈرامائی موڑ لیا جب فیئر پلے ایپ کے ایک ملازم کو اس معاملے کے سلسلے میں حراست میں لیا گیا۔
یہ بھی پڑھیں: تمنا بھاٹیہ نے ساڑھی میں تازہ ترین تصاویر شیئر کیں
