نئی دہلی: ریلائنس کے چیئرمین مکیش امبانی نے جمعرات کو کانگریس کی سابق صدر سونیا گاندھی اور لوک سبھا میں قائد حزب اختلاف راہل گاندھی سے ان کی رہائش گاہ 10 جن پتھ پر ملاقات کی۔ ریلائنس کے چیئرمین نے اننت امبانی اور رادھیکا مرچنٹ کی شادی کا کارڈ سونیا گاندھی کو پیش کیا، جو 12 جولائی کو ہونے والی ہے۔
شادی کی شاندار تقریب روایتی ہندو ویدک رسومات کے مطابق طے کی گئی ہے۔ مرکزی تقریبات کا آغاز 12 جولائی بروز جمعہ کو شادی کی تقریب سے ہوگا۔ ذرائع کے مطابق مہمانوں کو روایتی ہندوستانی لباس پہن کر آنے کی درخواست کی گئی ہے۔ شادی کی تقریبات 13 اور 14 جولائی کو بھی روایتی انداز میں جاری رہیں گی۔ مہمانوں سے کہا گیا ہے کہ وہ اس شاندار موقع پر 'ہندوستانی روایتی لباس پہنیں۔ اینکور ہیلتھ کیئر کے سی ای او ویرین مرچنٹ اور معروف تاجر شیلا مرچنٹ کی بیٹی رادھیکا مرچنٹ، امبانی خاندان کی بہو بنیں گی جس کے بعد دو ممتاز صنعت کار خاندانوں میں رشتہ قائم ہوجائے گا۔
واضح رہے کہ امبانی خاندان نے دو روز قبل اپنی انسان دوستی کے جذبے کا مظاہرہ کرتے ہوئے پالگھر میں 50 سے زیادہ پسماندہ جوڑوں کے لیے 'اجتماعی شادی' کا اہتمام کرکے اپنے بیٹے اننت امبانی اور رادھیکا مرچنٹ کی شادی کی تقریبات کا آغاز کیا تھا۔ یہ تقریب ریلائنس کارپوریٹ پارک میں منعقد ہوئی، جس میں تقریباً 800 لوگوں نے شرکت کی جن میں جوڑوں کے خاندان کے افراد، مقامی سماجی کارکنان اور کمیونٹی کے نمائندے شامل تھے۔
