نئی دہلی: وزیراعظم نریندر مودی نے منگل کو شہباز شریف کو پاکستان کے 24 ویں وزیر اعظم کے طور پر حلف اٹھانے پر مبارکباد دی۔ سوشل میڈیا پلیٹ فارم ایکس پر ایک پوسٹ میں پی ایم مودی نے شہباز شریف کو ٹیگ کرتے ہوئے لکھا کہ کو پاکستان کے وزیراعظم کے طور پر حلف اٹھانے پر آپ کو مبارکباد۔
واضح رہے کہ پاکستان مسلم لیگ نواز (پی ایم ایل این) کے رہنما شہباز شریف نے گزشتہ اتوار کو قومی اسمبلی میں وزیراعظم منتخب ہونے کے بعد پیر کے روز ایوان صدر میں وزیر اعظم کے طور پر حلف اٹھایا۔ حلف برداری ملک کے مختلف حصوں میں پاکستان تحریک انصاف (پی ٹی آئی) کی جانب سے 8 فروری کو ہونے والے عام انتخابات میں مبینہ دھاندلی کے مظاہروں کے درمیان منعقد ہوئی۔
پاکستان کے صدر عارف علوی نے ایوان میں شہباز شریف سے حلف لیا۔ پاکستان کے وزیر اعظم شہباز شریف کی حلف برداری کی تقریب میں مسلم لیگ (ن) کے قائد نواز شریف، سابق صدر آصف علی زرداری، پاکستان پیپلز پارٹی کے چیئرمین بلاول بھٹو زرداری، چیف آف آرمی سٹاف جنرل عاصم منیر، سندھ، بلوچستان اور پنجاب کے وزرائے اعلیٰ نے شرکت کی۔
شہباز شریف اتوار کو قومی اسمبلی میں 201 ووٹ حاصل کرنے کے بعد پاکستان کے وزیر اعظم منتخب ہوئے تھے۔ انہوں نے اپنے حریف عمر ایوب خان کو شکست دی جن کو پی ٹی آئی کی حمایت حاصل تھی۔ قابل ذکر ہے کہ پاکستان میں حکومت سازی چھ پارٹیوں کے اتحاد سے بنی ہے کیونکہ عام انتخابات میں کسی بھی پارٹی کو سادہ اکثریت حاصل نہیں ہوسکی تھی۔
یہ بھی پڑھیں:
شہبازشریف نے پاکستان کے 24ویں وزیراعظم کے عہدے کا حلف اٹھا لیا
پاکستان کے نو منتخب وزیر اعظم شہباز شریف نے اپنی پہلی ہی تقریر میں مسئلہ کشمیر پر کیا کہا؟
