نئی دہلی: دہلی کے وزیراعلیٰ اروند کیجریوال کی گرفتاری کے خلاف تحریک کو تیز کرتے ہوئے اپوزیشن انڈیا بلاک 31 مارچ کو قومی دارالحکومت کے رام لیلا میدان میں "ملک کے مفادات اور جمہوریت کے تحفظ" کے لیے مہا ریلی نکالنے کا اعلان کیا ہے۔
ایک پریس کانفرنس سے خطاب کرتے ہوئے انڈیا بلاک اتحادی عآپ اور کانگریس نے ریلی کا اعلان کیا۔ عآپ لیڈر گوپال رائے نے کہا کہ انڈیا بلاک کی اعلیٰ قیادت اس ریلی میں شرکت کرے گی۔
قابل ذکر ہے کہ یہ اعلان انفورسمنٹ ڈائریکٹوریٹ کے ذریعہ اروند کیجریوال کو ایکسائز پالیسی سے منسلک مبینہ منی لانڈرنگ کیس کے سلسلے میں ان کی سرکاری رہائش گاہ سے 21 مارچ کو گرفتار کرنے کے بعد آیا ہے اور پھر جمعہ کو ایک عدالت نے عآپ کے قومی کنوینر کیجریوال کو 28 مارچ تک ای ڈی کی تحویل میں دے دیا ہے۔
عآپ لیڈر گوپال رائے نے کہا کہ جمہوریت اور ملک خطرے میں ہے، انڈیا بلاک کی تمام جماعتیں ملک کے مفادات اور جمہوریت کی حفاظت کے لیے یہ 'مہا ریلی' نکالیں گی۔
کانگریس کی دہلی یونٹ کے سربراہ ارویندر سنگھ لولی نے الزام لگایا کہ اپوزیشن جماعتوں کو الیکشن میں لیول پلیئنگ فیلڈ نہیں دیا جا رہا ہے اور کہا کہ ان کی پارٹی کے کھاتوں کو منجمد کیا جارہا ہے۔
انہوں نے مزید کہا کہ 31 مارچ کی مہا ریلی نہ صرف سیاسی ہوگی بلکہ ملک کی جمہوریت کو بچانے اور بی جے پی زیرقیادت مرکز کے خلاف آواز اٹھانے کی کال ہوگی۔
یہ بھی پڑھیں: دہلی کے وزیر اعلی اروند کیجروال کا جیل سے پہلا آرڈر
