نئی دہلی: پولیس نے دہلی میٹرو میں دہلی کے وزیر اعلی اروند کیجریوال کے خلاف دھمکی آمیز پیغام لکھنے والے شخص کو گرفتار کیا ہے۔ گرفتار ملزم کی شناخت انکت گوئل کے طور پر کی گئی ہے جو بینک آف بڑودہ میں لون منیجر بتایا جاتا ہے۔ بتایا جاتا ہے کہ ملزم پہلے عام آدمی پارٹی کے قومی کنوینر اروند کیجریوال کا حامی تھا، لیکن اب وہ ان سے ناراض ہے۔ اس وجہ سے اس نے کیجریوال کے بارے میں دھمکی آمیز پیغامات لکھے تھے۔
میٹرو ٹرین کے کوچ کے اندر اور کئی اسٹیشنوں پر سی ایم کیجریوال کے خلاف دھمکی آمیز پیغامات کا معاملہ 20 مئی کو سامنے آیا تھا۔ عام آدمی پارٹی کے رہنماؤں نے ان پیغامات کے اسکرین شاٹس کو لے کر بی جے پی اور دہلی پولیس کو نشانہ بنایا تھا۔ عاپ لیڈروں نے کہا تھا کہ سی ایم کیجریوال کی جان کو خطرہ ہے۔ یہ پیغام انکیت گوئل نامی شخص نے اپنے سوشل میڈیا پلیٹ فارم انسٹاگرام اکاؤنٹ پر شیئر کیا ہے۔ اس کے بعد عام آدمی پارٹی اور بی جے پی کے لیڈروں نے بھی ایک دوسرے پر الزامات لگائے۔
اس معاملے کے زور پکڑتے ہی دہلی میٹرو ریل کارپوریشن (ڈی ایم آر سی) کی جانب سے 20 مئی کی شام دیر گئے دہلی پولیس میں شکایت درج کرائی گئی۔ شکایت کی بنیاد پر ایف آئی آر درج کرکے معاملے کی تحقیقات شروع کردی گئی۔ اس بارے میں دہلی پولیس میٹرو کے ڈی سی پی ڈاکٹر جی۔ رام گوپال نائک کی جانب سے یہ بھی اطلاع دی گئی کہ ڈی ایم آر سی سے دہلی میٹرو ٹرین کے کوچ میں ایک پیغام کی گردش کے خلاف شکایت موصول ہوئی ہے۔
یہ شکایت ڈی ایم آر سی نے میٹرو کوچ کے اندر سے رنگ اتارنے کے خلاف دی تھی۔ اس کے بعد راجوری گارڈن میٹرو پولیس اسٹیشن میں متعلقہ ایکٹ کے تحت مقدمہ درج کیا گیا۔ اس کے بعد اب بدھ کو دہلی میٹرو اسٹیشن اور کوچ کے اندر دھمکی آمیز پیغامات لکھنے والے کو گرفتار کر لیا گیا ہے اور مزید کارروائی کی جا رہی ہے۔
