پانچویں مرحلے میں تقریباً 57.44 فیصد پولنگ، مہاراشٹر میں سب سے کم ووٹنگ - Lok Sabha Election 2024

پیر کو 2024 کے لوک سبھا انتخابات کے پانچویں مرحلے میں تقریباً 57.44 فیصد ووٹ ڈالے گئے۔ مغربی بنگال میں سب سے زیادہ 73 فیصد پولنگ ریکارڈ کی گئی جب کہ مہاراشٹر میں، ممبئی کی چھ سیٹوں پر کم ووٹنگ کی وجہ سے سب سے کم 48.88 فیصد ووٹنگ ٹرن آؤٹ رہا۔ اوڈیشہ میں اسمبلی انتخابات کے دوسرے مرحلے میں 60.70 فیصد ووٹ ڈالے گئے۔

اس سے قبل لوک سبھا انتخابات کے پہلے مرحلے میں کل 66.14 فیصد ووٹنگ درج کی گئی تھی جبکہ دوسرے مرحلے میں کل 66.71 فیصد ووٹنگ، تیسرے مرحلے میں کل 65.68 فیصد ووٹنگ اور چوتھے مرحلے میں 66 فیصد پولنگ درج کی گئی تھی۔ لوک سبھا انتخابات سات مرحلوں پر مشتمل ہے۔ پانچ مرحلے مکمل ہونے کے بعد اب چھٹا مرحلہ 25 مئی کو ہے اور ساتواں مرحلہ یکم جون کو ہے۔ لوک سبھا انتخابات 2024 کے نتائج کا اعلان 4 جون کو کیا جائے گا۔

ممبئی: مہاراشٹر کے سابق وزیر اعلیٰ اور شیو سینا (یو بی ٹی) کے سربراہ ادھو ٹھاکرے کا کہنا ہے کہ "میں نے دیکھا ہے کہ ووٹرز بڑی تعداد میں ووٹنگ سینٹر پر جا رہے ہیں لیکن تکلیف کی وجہ سے انہیں پولنگ بوتھ سے واپس جانا پڑا ہے۔ کیونکہ پولنگ بوتھ کے اندر کافی زیادہ وقت لیا جا رہا ہے تاکہ لوگوں کو ووٹ ڈالنے میں پریشانی کا سامنا کرنا پڑے اور وہ بغیر ووٹ دیے واپس چلے جائیں۔ ادھو ٹھاکرے نے ایسے تمام ووٹرز سے درخواست کی ہے کہ وہ پولنگ بوتھ پہنچے اور اپنا ووٹ کاسٹ کریں کیونکہ ووٹ ڈالنا آپ کا آئینی حق ہے۔

کپواڑہ، جموں و کشمیر: نیشنل کانفرنس کے نائب صدر اور بارہمولہ لوک سبھا سیٹ سے امیدوار عمر عبداللہ کا کہنا ہے، "لوگ بڑی تعداد میں الیکشن میں حصہ لے رہے ہیں، کوئی ایسی جگہ نہیں ہے جہاں پچھلی بار سے کم ووٹنگ ہوئی ہو، جن لوگوں نے ابھی تک اپنا ووٹ نہیں ڈالا، میں ان سے اپیل کرتا ہوں کہ وہ باہر نکلیں اور ووٹ دیں۔ عمر عبداللہ نے یہ بھی کہا کہ اگر آرٹیکل 370 کی منسوخی ہی ووٹر ٹرن آؤٹ کی اچھی وجہ ہے، تو پھر 1990 سے پہلے انتخابات میں اچھی ووٹنگ کیوں ہوئی؟ "

لوک سبھا انتخابات کے پانچویں مرحلے میں ووٹنگ کا وقت شام چھ بجے ختم ہوگیا ہے۔ شام 5 بجے تک 8 ریاستوں اور مرکز کے زیر انتظام علاقوں کی 49 نشستوں پر تقریباً 56.68 فیصد ووٹ ڈالے گئے۔ الیکشن کمیشن شام 7 بجے کے بعد اعداد و شمار کو اپ ڈیٹ کرے گا۔

سب سے زیادہ ٹرن آؤٹ مغربی بنگال میں 73.00 فیصد رہا۔ یہاں دیکھیں ہر ایک ریاست میں پولنگ ٹرن آوٹ۔ بہار: 52.35، جموں و کشمیر: 54.21، جھارکھنڈ: 61.90، لداخ: 67.15، مہاراشٹر: 48.66، اڈیشہ: 60.55، اتر پردیش: 55.80، مغربی بنگال: 73.00

مہاراشٹر: ریلائنس انڈسٹریز کے چیئرمین مکیش امبانی، ریلائنس فاؤنڈیشن کی بانی اور چیئرپرسن نیتا امبانی اپنے بیٹے کے ساتھ ووٹ ڈالنے کے لیے ممبئی میں ایک ووٹنگ سینٹر پہنچے۔ ووٹ ڈالنے کے بعد ریلائنس انڈسٹریز کے چیئرمین مکیش امبانی نے کہا کہ ہر بھارتی کو ووٹ دینا چاہئے اور میں ہر ایک سے ووٹ دینے کی اپیل کرتا ہوں۔

لوک سبھا انتخابات کے پانچویں مرحلے میں سہ پہر تین بجے تک مغربی بنگال میں سب سے زیادہ ووٹنگ فیصد 62.72 ریکارڈ کی گئی۔ لیکن تشدد کے کچھ واقعات نے مغربی بنگال کے سات پارلیمانی حلقوں میں انتخابات کو متاثر کیا۔ بیرک پور، بونگاؤں اور آرام باغ سیٹوں کے مختلف حصوں میں ٹی ایم سی اور بی جے پی کے کارکنوں میں جھڑپ ہوئی۔ پولنگ پینل نے کہا کہ اسے مختلف سیاسی جماعتوں سے 1,036 شکایات موصول ہوئی ہیں جن میں ای وی ایم میں خرابی اور ایجنٹوں کو بوتھوں میں داخل ہونے سے روکنے کا الزام لگایا گیا ہے۔

جموں و کشمیر: بارہمولہ میں ایک پولنگ بوتھ پر ووٹرز کی اس وقت لمبی قطاریں دیکھی گئیں، جب وہ ووٹ ڈالنے کے لیے اپنی باری کا انتظار کر رہے تھے۔ بارہمولہ پارلیمانی حلقہ کے لیے آج ووٹنگ ہو رہی ہے۔ اس حلقے میں این سی کے عمر عبداللہ، پی ڈی پی کے میر محمد فیاض اور جے کے پی سی کے سجاد لون کے درمیان مقابلہ ہے۔ سہ پہر تین بجے تک یہاں پر 45 فیصد پولنگ درج کی گئی ہے۔

بالی ووڈ کے سپر اسٹار شاہ رخ خان، عامر خان اور رنبیر کپور نے پیر کو ممبئی میں پولنگ کے دن سہ پہر کے وقت اپنا ووٹ کاسٹ کیا۔ اداکار پریم چوپڑا اور شرمن جوشی نے بھی اپنا ووٹ کاسٹ کرتے نظر آئے۔

لوک سبھا انتخابات 2024 کے پانچویں مرحلے میں سہ پہر 3 بجے 47.53 فیصد ووٹنگ درج کی گئی ہے، لداخ میں سب سے زیادہ 61 فیصد پولنگ درج کی گئی ہے جبکہ مہاراشٹر میں سب کم 39 فیصد ووٹنگ درج کی گئی ہے۔

جھارکھنڈ کے ہزاری باغ ضلع کے ایک گاؤں میں 2,000 سے زیادہ ووٹروں نے پیر کے روز لوک سبھا انتخابات کا بائیکاٹ کیا۔ پل کے لیے ان کا دیرینہ مطالبہ پورا نہ ہونے پر گاوں والوں ایک بھی ووٹ کاسٹ نہ کرنے کا فیصلہ کیا تھا۔ یہ واقعہ ریاست کی راجدھانی رانچی سے تقریباً 105 کلومیٹر دور کٹکمڈگ پولیس اسٹیشن کے دائرہ اختیار میں آنے والے کسمبھا گاؤں میں پیش آیا۔ یہ گاؤں ہزاری باغ لوک سبھا حلقہ کا حصہ ہے۔ دوپہر تک، کسمبھا کے مڈل اسکول میں بوتھ نمبر 183 اور 184 پر کوئی ووٹ نہیں ڈالا گیا تھا۔ پولنگ اہلکار ووٹرز کا انتظار کرتے نظر آئے۔ بوتھ 184 کے پریزائیڈنگ آفیسر سبودھ پرساد ورما نے کہا کہ میں صبح 7 بجے سے یہاں ہوں، لیکن ابھی تک کوئی ووٹ ڈالنے نہیں آیا ہے۔

مہاراشٹر کے نائب وزیر اعلیٰ دیویندر فڑنویس نے پیر کو کہا کہ انہوں نے الیکشن کمیشن آف انڈیا سے ممبئی میں ووٹنگ کی سست رفتاری کی شکایات پر غور کرنے کی درخواست کی ہے۔ ممبئی کے چھ سمیت مہاراشٹر کے 13 لوک سبھا حلقوں میں صبح 7 بجے سے پولنگ جاری ہے جو شام 6 بجے تک جاری رہے گی۔ دوپہر 1 بجے تک، ممبئی نارتھ سیٹ پر 26.78 فیصد، ممبئی نارتھ سینٹرل میں 28.05 فیصد، ممبئی نارتھ ایسٹ میں 28.82 فیصد، ممبئی نارتھ ویسٹ میں 28.41 فیصد، ممبئی ساؤتھ میں 24.46 فیصد اور ممبئی ساؤتھ سنٹرل پر 27.21 فیصد پولنگ ہوئی ہے۔

وایناڈ (کیرالہ) اور رائے بریلی (اتر پردیش) سے کانگریس کے رکن پارلیمنٹ اور امیدوار راہل گاندھی رائے بریلی میں ایک پولنگ بوتھ کا معائنہ کرنے پہنچے۔

بہار: 34.62 فیصد

جموں و کشمیر: 34.79 فیصد

جھارکھنڈ: 41.89 فیصد

لداخ: 52.02 فیصد

مہاراشٹر: 27.78 فیصد

اڈیشہ: 35.31 فیصد

اتر پردیش: 39.35 فیصد

مغربی بنگال: 48.41 فیصد

اداکار سنجے دت نے پولنگ بوتھ پر اپنا ووٹ ڈالا۔ انہوں نے کہا کہ "میں سب سے اپیل کرتا ہوں کہ سب لوگ ووٹ ضرور کریں"

اداکارہ شلپا شیٹی نے اپنے خاندان کے ساتھ ممبئی ایک پولنگ بوتھ پر اپنا ووٹ کاسٹ کیا۔

پروڈیوسر اور ہدایت کار راکیش روشن اور اداکار ہریتک روشن نے اپنا ووٹ کاسٹ کیا۔

پرسار بھارتی کے صدر نونیت سہگل نے اپنے خاندان کے ساتھ لکھنؤ کے ایک پولنگ بوتھ پر ووٹ ڈالا۔

جموں و کشمیر کے ہندواڑہ میں جے کے پی سی صدر اور بارہمولہ پارلیمانی حلقہ سے امیدوار سجاد لون نے کہا، میں اپنی جیت کے بارے میں بہت پراعتماد ہوں۔

فلم پروڈیوسر اور تجربہ کار اداکار سلیم خان اور ان کی اہلیہ سلمیٰ خان نے لوک سبھا الیکشن کے پانچویں مرحلے کے لیے اپنا ووٹ ڈالنے کے لیے ممبئی کے ایک پولنگ اسٹیشن پہنچے۔

سابق بھارتی کرکٹر سچن ٹنڈولکر اور ان کے بیٹے ارجن ٹنڈولکر نے پولنگ بوتھ پر اپنا ووٹ کاسٹ کیا۔

اداکار رنویر سنگھ اور اداکارہ دیپیکا پڈوکون نے لوک سبھا الیکشن 2024 کے پانچویں مرحلے کے لیے اپنا ووٹ ڈالنے کے لیے ممبئی کے ایک پولنگ اسٹیشن پہنچے۔

اڈیشہ: 1 فٹ 6 انچ قد کی 47 سالہ خاتون ونیتا سیٹھ، بالانگیر لوک سبھا حلقہ کے تحت پٹناگھ کے ایک پولنگ بوتھ پر ووٹ ڈالنے کے بعد اپنی سیاہی والی انگلی دکھاتی ہوئی۔

ووٹ ڈالنے کے بعد اداکارہ شبانہ اعظمی نے کہا کہ "یہ ہر شہری کا سب سے بڑا حق اور سب سے بڑی ذمہ داری ہے، میں سب سے اپیل کرتی ہوں کہ ووٹ ضرور ڈالیں۔"

ووٹ ڈالنے کے بعد اداکار منوج باجپائی نے کہا کہ یہ سب سے بڑا تہوار ہے اور سب کو اپنے ووٹ کا استعمال کرنا چاہیے، اگر آپ ووٹ نہیں دیتے ہیں تو آپ کو شکایت کرنے کا حق نہیں ہے۔

اداکار انیل کپور ممبئی کے ایک پولنگ بوتھ پر اپنا ووٹ ڈال رہے ہیں۔

شیو سینا (یو بی ٹی) کی رکن پارلیمنٹ پرینکا چترویدی نے کہا کہ "یہ ایک اہم الیکشن ہے، ایسا انتخاب جو ملک کی سمت اور حالت بدل دے گا۔ نریندر مودی بار بار کہہ رہے ہیں کہ وہ 400 کو عبور کرنا چاہتے ہیں کیونکہ وہ آئین کو ختم کرنا چاہتے ہیں۔ آئین کی حفاظت کے لیے، میں شہریوں کو ان کے حقوق کے بارے میں یاد دلانا چاہتی ہوں اور اپنا ووٹ کاسٹ کرنے کی اپیل کرتی ہوں۔

بھارتی کرکٹر اجنکیا رہا نے اور ان کی اہلیہ نے ممبئی کے ایک پولنگ بوتھ پر اپنا ووٹ کاسٹ کیا۔

اداکار نانا پاٹیکر نے ممبئی کے ایک پولنگ بوتھ پر ووٹ کیا، اس دوران کہا کہ نوجوانوں کو چاہیے کہ ہر کوئی ووٹ ڈالے۔

اداکار انوپم کھیر نے کہا کہ آج ہم سب کو یہ تہوار منانے کا موقع ملا ہے، اس لیے ہمیں باہر نکل کر ووٹ دینا چاہیے تاکہ ہم 5 سال کے لیے کیسی حکومت اور کیسا نظام چاہتے ہیں اس کا فائدہ اٹھا سکیں۔"

گلوکار وشال دڈلانی نے کہا کہ "یہ ہم سب کی ذمہ داری ہے کہ باہر نکلیں اور لوگوں کو راستہ دکھائیں۔ میں سب سے ووٹ دینے کی درخواست کروں گا۔ ووٹ ان لوگوں کو دیں جنہوں نے آپ کو سپورٹ کیا ہے۔"

مغربی بنگال: ہگلی لوک سبھا حلقہ سے بی جے پی امیدوار لاکٹ چٹرجی اور ٹی ایم سی کارکنوں کے درمیان مبینہ طور پر جھڑپ ہوئی۔

بہار: 21.11 فیصد

جموں و کشمیر: 21.37 فیصد

جھارکھنڈ: 26.18 فیصد

لداخ: 27.87 فیصد

مہاراشٹر: 15.93 فیصد

اڈیشہ: 21.07 فیصد

اتر پردیش: 27.76 فیصد

مغربی بنگال: 32.70 فیصد

کانگریس کے رکن پارلیمنٹ اور رائے بریلی سے امیدوار راہل گاندھی لکھنؤ ہوائی اڈے پر پہنچے۔

جموں و کشمیر: پونچھ میں لوگوں نے لوک سبھا الیکشن 2024 کے پانچویں مرحلے کے لیے پولنگ آفیسرس کی ٹیم نے پہلی بار گھر جا کر ووٹ کرایا۔

مہاراشٹر کے سابق وزیر اعلیٰ ادھو ٹھاکرے اپنے بیٹے آدتیہ ٹھاکرے کے ساتھ لوک سبھا الیکشن 2024 کے لیے ووٹ ڈالنے کے لیے ممبئی کے ایک پولنگ بوتھ پر پہنچے۔

اداکار سنیل شیٹی نے ممبئی میں ووٹ ڈال کر اپنا شہری فرض پورا کیا۔

متھرا لوک سبھا سیٹ سے بی جے پی امیدوار ہیما مالنی نے اپنا ووٹ ڈالا۔

اداکار دھرمیندر نے لوک سبھا انتخابات 2024 کے پانچویں مرحلے کے لیے ووٹ دیا۔ ووٹوں کی اپیل کے سوال پر اداکار دھرمیندر نے کہا کہ "لوگ جانتے ہیں کہ ایک اچھا ہندوستانی کیسے بننا ہے اور ہندوستان کو کیسے آگے لے جانا ہے، مجھے یقین ہے کہ وہ ایک اچھا ہندوستانی ہیں"

وزیر دفاع راج ناتھ سنگھ نے لکھنؤ کے پولنگ بوتھ پر اپنا ووٹ ڈالا۔ راج ناتھ سنگھ لکھنؤ لوک سبھا سیٹ سے بی جے پی کے امیدوار ہین۔

ووٹ ڈالنے کے بعد اداکار اور شیو سینا کے رہنما گووندا نے کہا کہ "ابھی کسی اور موضوع پر کوئی بحث نہیں ہوگی، گھر سے باہر آؤ اور ووٹ دو۔"

مہاراشٹر کے وزیر اعلی ایکناتھ شندے نے تھانے میں ایک پولنگ بوتھ پر اپنا ووٹ ڈالا۔ مہاراشٹر کے وزیر اعلی ایکناتھ شندے نے کہا کہ "جو فیصلے لینے چاہیے تھے وہ مودی حکومت نے دس سالوں میں لیے ہیں، اس لیے مہاراشٹر کے لوگ مہا یوتی کو ووٹ دیں گے۔"

اداکار عامر خان کی بیٹی ایرا خان اور بیٹے جنید خان نے ممبئی کے ایک پولنگ بوتھ پر اپنا ووٹ کاسٹ کیا۔

لوک سبھا انتخابات: شاہد کپور نے ممبئی میں اپنا ووٹ ڈالا۔

اداکارہ انیتا راج نے اپنا ووٹ کاسٹ کیا۔ اس موقع پر اداکارہ انیتا راج نے کہا کہ "ہم سب اس ملک کے ذمہ دار شہری ہیں، آپ آئیں اور ووٹ دیں۔ مجھے معلوم ہوا ہے کہ ووٹنگ کم تعداد میں ہو رہی ہے، اس لیے سستی نہ کریں، باہر آئیں اور ووٹ دیں۔ یہ بہت اہم ہے۔"

بہار: 8.86 فیصد

جموں و کشمیر: 12.89 فیصد

جھارکھنڈ: 11.68 فیصد

لداخ: 10.51 فیصد

مہاراشٹر: 6.33 فیصد

اڈیشہ: 6.87 فیصد

اتر پردیش: 12.89 فیصد

مغربی بنگال: 15.35 فیصد

مغربی بنگال: بیرک پور لوک سبھا سیٹ سے بی جے پی کے امیدوار ارجن سنگھ کی مبینہ طور پر ٹی ایم سی کارکن سے جھڑپ ہوئی۔

آر جے ڈی لیڈر منوج کمار جھا نے کہا کہ "انتخابات کے 5ویں مرحلے کے بارے میں ملک اور بہار سے اب تک آنے والی خبریں ہمارے لیے ایک بہت ہی معنی خیز پیغام ہے، عوام بور ہو چکی ہے، اگر وہ ( تیجسوی یادو) یہ کہہ رہے ہیں، اس کا مطلب ہے کہ یہ تعداد 300 سے تجاوز کر جائے گی اور 4 جون کے بعد ملک کو روزگار پر مبنی حکومت ملے گی۔

جھارکھنڈ کے سابق وزیر اعلیٰ ہیمنت سورین کی اہلیہ کلپنا سورین اور گانڈے اسمبلی ضمنی انتخاب میں جے ایم ایم امیدوار نے کہا کہ "میں گانڈے، کوڈرما اور ہزاری باغ کے ووٹروں سے اپیل کرنا چاہتی ہوں کہ وہ باہر آئیں اور ووٹ دیں۔ گانڈے کہ عوام نے ہمیں پہلے بھی محبتوں سے نوازا ہے، وہ ہمیں دوبارہ دعائیں دینے والے ہیں، یہ الیکشن بی جے پی بمقابلہ عوام کے درمیان ہے اور ہم عوام کے امیدوار ہیں، اس بار پوری حمایت انڈیا اتحاد کو دی جائے گی۔

امیٹھی سے بی جے پی کی امیدوار اور مرکزی وزیر اسمرتی ایرانی لوک سبھا انتخابات 2024 کے پانچویں مرحلے میں ووٹ ڈالنے کے لیے پولنگ بوتھ پہنچیں۔ اس موقع پر اسمرتی ایرانی نے کہا کہ "پ کو جلد از جلد اپنے پولنگ بوتھ پر جانا چاہئے اور اس جشن میں حصہ لینا چاہئے۔ یہ ہندوستان اور اس کے مستقبل کے تئیں ہماری ذمہ داری ہے، اسے پورا کریں۔ میں خوش قسمت ہوں کہ میں نے اپنا ووٹ ایک ایسے لیڈر کو دیا ہے جو اپنے گاؤں میں غریبوں کی فلاح و بہبود اور خواتین کو بااختیار بنانے کے لیے وقف ہے اور امید کرتا ہوں کہ لوگ اسے اپنا پیار دیں گے۔

کانگریس کی ریاستی صدر اور ممبئی شمالی وسطی سے لوک سبھا کی امیدوار ورشا گائیکواڈ نے اپنا ووٹ ڈالا۔

اداکار پریش راول نے لوک سبھا الیکشن 2024 کے پانچویں مرحلے کے لیے ووٹ دیا۔

بہار کے چھپرا میں سارن لوک سبھا سیٹ سے آر جے ڈی امیدوار روہنی آچاریہ نے کہا کہ یہ جمہوریت کا تہوار ہے۔ میں تمام ووٹرز سے درخواست کرتی ہوں کہ وہ اپنے ووٹ کا حق استعمال کریں۔ وہ (بی جے پی امیدوار راجیو پرتاپ روڈی) میرے چچا ہیں، میں ان کی دعائیں میرے ساتھ ہیں۔ مجھے یقین ہے کہ وہ مجھ پر فخر کرتے ہے اور آج مجھے دعا دیں گے۔ تیجسوی یادو کے اس بیان پر کہ 'انڈیا الائنس کو 300 سیٹیں ملیں گی'، انہوں نے کہا کہ وہ ٹھیک کہتے ہیں، عوامی جھکاؤ اس بار وہی ہے۔ عوام بے روزگاری اور مہنگائی کا شکار ہے، اس بار عوام کی جیت ہوگی۔

جموں و کشمیر: نیشنل کانفرنس کے نائب صدر عمر عبداللہ نے کہا کہ "مجھے امید ہے کہ لوگ اپنے ووٹ کا استعمال کریں گے۔ جمہوریت میں سب سے بڑی طاقت عوام کی آواز، عوام کا ووٹ ہے۔ میں بارہمولہ کے لوگوں سے اپیل کرتا ہوں کہ وہ باہر نکلیں اور اپنا ووٹ کاسٹ کریں۔ میں ہمیشہ سے کہتا رہا ہوں کہ یہ دعویٰ درست نہیں کہ سیاح بڑی تعداد میں آ رہے ہیں اور اس سے ہم سیاحوں کی زندگیوں کو خطرے میں ڈال رہے ہیں۔ اگر سیاحوں کو سکیورٹی فراہم نہیں کی جا سکتی تو ہمیں ایسے دعوے کرنے سے گریز کرنا چاہیے۔‘‘

اپنا ووٹ ڈالنے کے بعد یوپی کے نائب وزیر اعلی برجیش پاٹھک نے کہا کہ "میں ہر ایک سے اپیل کرتا ہوں کہ وہ ترقی یافتہ ہندوستان کے عزم کو پورا کرنے کے لیے 100 فیصد ووٹ دیں۔ ہم ریاست کے 80 کے 80 فیصد سیٹ جیت رہے ہیں۔ امیٹھی اور رائے بریلی سے بھی جیت رہے ہیں۔

اداکارہ سانیا ملہوترا ممبئی کے ایک پولنگ بوتھ پر لوک سبھا انتخابات 2024 کے پانچویں مرحلے کے لیے ووٹ ڈالنے پہنچی۔

آر بی آئی گورنر شکتی کانت داس نے اپنے اہل خانہ کے ساتھ ووٹ ڈالا۔ اس موقع پر آر بی آئی گورنر شکتی کانت داس نے کہا کہ "جب ہم ووٹ دیتے ہیں تو ہمیں بہت فخر محسوس ہوتا ہے، میں ہر ایک سے درخواست کرنا چاہتا ہوں کہ وہ جلد از جلد اپنا ووٹ ڈالیں۔"

اداکار راج کمار راؤ نے ممبئی کے ایک پولنگ بوتھ پر اپنا ووٹ ڈالا۔ اس موقع پر اداکار راج کمار راؤ نے کہا کہ "یہ ہم سب کی ملک کے لیے ایک بڑی ذمہ داری ہے، ہمیں ووٹ دینا چاہیے، میں ہر ایک سے اپنا ووٹ ڈالنے کی اپیل کرتا ہوں۔"

جموں و کشمیر: ووٹر بڈگام میں ایک پولنگ بوتھ پر پہنچ رہے ہیں تاکہ لوک سبھا الیکشن 2024 کے پانچویں مرحلے کے لیے اپنا ووٹ ڈال سکیں۔

اداکارہ جانہوی کپور لوک سبھا الیکشن 2024 کے پانچویں مرحلے کے لیے اپنا ووٹ ڈالنے کے لیے ممبئی کے ایک پولنگ بوتھ پر پہنچیں۔

حاجی پور سے ایل جے پی (رام ولاس) کے امیدوار اور ایل جے پی (رام ولاس) کے سربراہ چراغ پاسوان نے کہا کہ "مجھے لگتا ہے کہ حاجی پور کے ساتھ میرا تعلق بچپن سے ہے، وکاس نے جو کام کیا ہے اسے آگے بڑھانے کے عزم کے ساتھ میں نکلا ہوں، یہ حاجی پور میں کام کرنے کا تجربہ ہے، ہمارا اتحاد ہے۔ ملک بھر میں 400 کو پار کر رہا ہے لیکن انڈیا اتحاد کو کم سیٹیں ملیں گی۔"

اداکار فرحان اختر اور ہدایت کار زویا اختر نے ممبئی کے ایک پولنگ بوتھ پر اپنا ووٹ ڈالا۔

مرکزی وزیر اور ممبئی شمالی لوک سبھا سیٹ سے بی جے پی کے امیدوار پیوش گوئل ووٹ ڈالنے کے لیے ممبئی کے ایک پولنگ بوتھ پر پہنچے۔

جموں اور کشمیر: لوگ لوک سبھا الیکشن 2024 کے پانچویں مرحلے کے لیے ووٹ ڈالنے کے لیے بانڈی پورہ میں ایک پولنگ بوتھ پر پہنچے۔

اتر پردیش کی سابق وزیر اعلیٰ اور بی ایس پی سربراہ مایاوتی نے لکھنؤ کے ایک پولنگ بوتھ پر لوک سبھا الیکشن 2024 کے لیے اپنا ووٹ ڈالا۔ اس موقع پر بی ایس پی سربراہ مایاوتی نے کہا کہ "میں نے ووٹ دے دیا ہے، میں تمام ووٹروں سے ووٹ دینے کی اپیل کرتی ہوں، میں تمام سیاسی جماعتوں سے کہنا چاہتی ہوں کہ انہیں عوامی مفاد کے مسائل کو ترجیح دینی چاہیے۔"

اداکار اکشے کمار لوک سبھا الیکشن 2024 کے پانچویں مرحلے کے لیے اپنا ووٹ ڈالنے کے لیے ممبئی کے ایک پولنگ بوتھ پر پہنچے۔ اس موقع پر اداکار اکشے کمار نے کہا کہ "میں چاہتا ہوں کہ میرا بھارت ترقی یافتہ، مضبوط ہو اور اس بات کو ذہن میں رکھتے ہوئے میں نے ووٹ دیا ہے، مجھے لگتا ہے کہ اس بار زیادہ سے زیادہ لوگ ووٹ دیں گے۔"

ریلائنس گروپ کے چیئرمین انیل امبانی ممبئی کے ایک پولنگ بوتھ پر قطار میں کھڑے، ووٹنگ شروع ہونے کا انتظار کر رہے ہیں۔

پانچویں مرحلے سے پہلے پی ایم نریندر مودی نے ملک کے لوگوں سے زیادہ سے زیادہ تعداد میں ووٹنگ میں حصہ لینے کی اپیل کی ہے۔ انہوں نے ایکس پر ایک پوسٹ میں لکھا کہ لوک سبھا انتخابات کے پانچویں مرحلے میں آج 8 ریاستوں اور مرکز کے زیر انتظام علاقوں کی 49 سیٹوں کے لیے ووٹ ڈالے جائیں گے۔ میں اس مرحلے کے تمام ووٹرز سے درخواست کرتا ہوں کہ وہ اپنا ووٹ کاسٹ کریں اور ووٹنگ کا نیا ریکارڈ بنائیں۔ میری خواتین اور نوجوان ووٹروں سے خصوصی اپیل ہے کہ وہ جمہوریت کے اس تہوار میں جوش و خروش سے شرکت کریں۔

حیدرآباد: لوک سبھا انتخابات 2024 کے پانچویں مرحلے میں 8 ریاستوں کی 49 سیٹوں پر ووٹنگ جاری ہے۔ پیر کی صبح 7 بجے سے شام 6 بجے تک چھ ریاستوں اور دو مرکز کے زیر انتظام علاقوں کی 49 نشستوں پر ووٹنگ شروع ہو چکی ہے۔ اس مرحلے میں کل 695 امیدوار اپنی قسمت آزما رہے ہیں۔ پانچویں مرحلے میں یوپی کی 14، مہاراشٹر کی 13، مغربی بنگال کی 7، اڈیشہ-بہار کی 5-5، جھارکھنڈ کی 3، مرکز کے زیر انتظام جموں و کشمیر اور لداخ کی 1-1 سیٹوں پر انتخابات ہو رہے ہیں۔ اڈیشہ کی 35 اسمبلی سیٹوں پر بھی ووٹنگ جاری ہے۔