نئی دہلی: کانگریس نے میڈیکل داخلہ امتحان (NEET 2024) میں مبینہ بے ضابطگیوں کے خلاف اپنی تحریک کو تیز کرنے اور اسے منطقی انجام تک پہنچانے کے لیے 21 جون کو اس معاملے پر ملک گیر احتجاج کرنے کا اعلان کیا ہے۔
اس کے علاوہ کانگریس اس معاملے کو پارلیمنٹ میں بھی اٹھائے گی۔ پارٹی کے اندرونی ذرائع کے مطابق، نیٹ انٹرنس ٹیسٹ میں مبینہ بے ضابطگیوں نے لاکھوں طلباء کو متاثر کیا ہے اس لیے کانگریس پارٹی اس مسئلے کو منطقی انجام تک پہنچانا چاہتی ہے۔
کانگریس پارٹی کے اندرونی ذرائع کا کہنا ہے کہ نیٹ کے نتائج کے اعلان کے بعد سے کانگریس کئی پلیٹ فارم سے اس مسئلے کو اٹھا رہی ہے۔
کانگریس نے اس معاملے کی سپریم کورٹ کی نگرانی میں تحقیقات کا مطالبہ کیا ہے۔ اسی وقت حکومت نے ابتدا میں ان الزامات کو مسترد کرتے ہوئے کہا تھا کہ پری میڈیکل داخلہ ٹیسٹ کے نتائج میں کوئی بے ضابطگی نہیں ہوئی تھی، لیکن بعد میں اس نے تسلیم کیا کہ داخلہ امتحان کے کچھ پہلوؤں کی چھان بین کی ضرورت ہے۔
اب کانگریس نے پارٹی کی تمام ریاستی اکائیوں کو 21 جون کو ملک کی مختلف ریاستوں کے دارالحکومتوں میں سینئر لیڈروں کے ساتھ احتجاج کرنے کی ہدایت دی ہے۔ اس کے علاوہ کانگریس 24 جون سے شروع ہونے والے پارلیمنٹ کے خصوصی اجلاس کے دوران بھی یہ مسئلہ اٹھانے کے لیے انڈیا اتحاد کی جماعتوں کو متحد کر رہی ہے۔
کانگریس لیڈر اور لوک سبھا کے رکن پارلیمنٹ گورو گگوئی نے ای ٹی وی بھارت سے بات کرتے ہوئے کہا کہ یہ ایک معمہ ہے کہ جب پوری قوم 4 جون کو انتخابی نتائج پر بات کر رہی تھی تو اسی دن اس داخلہ ٹیسٹ کے نتائج کا اعلان کیوں کیا گیا۔ ایسا محسوس ہورہا ہے کہ حکومت یہ جانتی تھی کہ طوفان آنے والا ہے اور وہ اس نتائج پر کسی بھی بحث سے بچنا چاہتے ہیں۔ یہی وجہ ہے کہ ہم سپریم کورٹ کی نگرانی میں ان تمام بے ضابطگیوں کی تحقیقات چاہتے ہیں کیونکہ اس ملک میں 24 لاکھ نوجوانوں کی زندگیوں سے نہیں کھیلا جا سکتا۔
کانگریس لیڈر نے کہا کہ اس معاملے میں حکومت راہ فرار اختیار کرنا چاہتی ہے اور وہ عوام کے تئیں اپنی ذمہ داری سے بچنا چاہتی ہے۔ لیکن اب انڈیا بلاک کے پاس اتنی طاقت ہے کہ وہ حکومت کو گھٹنے ٹیکنے اور طلباء کے سامنے جوابدہ بنانے کے لیے مجبور کر سکتی ہے۔
اے آئی سی سی کے کارکن بی ایم سندیپ کمار نے ای ٹی وی بھارت کو بتایا کہ پر میڈیکل داخلہ امتحان کی تحقیقات کے مطالبے کے بارے میں مرکزی حکومت کا رویہ غیر ذمہ دارانہ اور غیر حساس تھا کیونکہ اس نے متنازعہ امتحانات کرنے والی ایجنسی سے کہا تھا کہ وہ نظام میں بے ضابطگیوں کی تحقیقات کرے۔
ہمارا خیال ہے کہ اگر تفتیش خود این ٹی اے کی قیادت میں ہوگی تو کوئی بھی تفتیش منصفانہ اور جامع نہیں ہو سکتی۔ انہوں نے زور دیا کہ این ٹی اے کے چیئرمین کو ان کے عہدے سے ہٹایا جائے۔ انہوں نے یہ بھی کہا کہ ہمارے انتخابی منشور میں مختلف مسائل پر طلبہ کے تحفظات دور کرنے کا وعدہ کیا گیا تھا۔
پری میڈیکل داخلہ امتحان ملک کے لیے ڈاکٹروں کے انتخاب اور تربیت کا ایک نظام ہے۔ اگر نظام منصفانہ نہیں ہے تو صحت کی دیکھ بھال کے نظام کو نقصان پہنچے گا اور اس نضام کو نقصان پہنچانے کی اجازت کبھی بھی کسی کو نہیں دی جائے گی۔
