చెత్త నుంచి ఆస్పత్రికి.. పోలీసుల మానవత్వం!

దిక్కులేని వారిక దేవుడే దిక్కు అనే మాట నిత్యం ఏదో ఒక మూల నిజం అని నిరూపించబడుతూ ఉంటుంది. ఆ దేవుడి రూపంలో పోలీసులు చాలాసార్లు దిక్కులేని వారి పాలిట దిక్కై నిలిచారు. ఈ సారి సంగారెడ్డి పోలీసులు ఆ పాత్ర పోషించారు. మతిస్థిమితం సరిగ్గా లేని ఓ వృద్ధుడు నిత్యం చెత్తకుప్పలో పడుకోవడం గమనించిన సంగారెడ్డి పోలీసులు అతడిని సంగారెడ్డి ప్రభుత్వాసుపత్రికి తరలించారు.

అతడికి నా అనే వారెవరూ లేరు. ఆకలేస్తే అన్నం పెట్టే దిక్కు లేదు. నిద్రొస్తే పడుకోవడానికి కాసింత నీడ, గూడు కూడా లేదు. చెత్తకుండే అతడికి అన్నం పెట్టే అమ్మ. నిద్రొస్తే.. ఆ చెత్తకుప్పే అతడికి పూలపాన్పు. నిత్యం అతడిని చాలామంది చూసేవారు. కానీ.. ఎవరూ పట్టించుకునేవారు కాదు. కానీ.. సమాజ బాధ్యతను ఖాకీ చొక్క వేసుకొని మరీ కాపలా కాస్తున్న పోలీసులు చూస్తూ ఊరుకోలేదు. ఆ వృద్ధుడిని ఆస్పత్రికి తరలించారు. తగిన వైద్యం చేయించి అతడి బాగోగులు చూసుకుంటున్నారు.

సంగారెడ్డి పట్టణంలోని పాత బస్టాండు సమీపంలోని ఓ రోడ్డు మధ్యలో చెత్త కూరుకుపోయింది. అందులోనే రోజూ ఓ వ్యక్తి పడుకునేవాడు. ఆ చెత్తలో ఏదైనా ఆహార పదార్థం దొరికితే అది తిని ఆకలి తీర్చుకునేవాడు. విసుగొచ్చినప్పుడు అలా తిరిగొచ్చి.. మళ్లీ ఆ చెత్తకుప్పలోనే కూర్చునేవాడు. ప్రస్తుత కరోనా పరిస్థితుల్లో మామూలు మనుషులను ముట్టుకోవడానికే భయపడుతున్న తరుణంలో ఇలాంటి వ్యక్తులను ఎవరు పట్టించుకుంటారు. కానీ.. పోలీసులు అలా కాదు కదా! అందుకే.. ఆతడిని గమనించిన పోలీసులు ఆ వ్యక్తిని సంగారెడ్డి ప్రభుత్వాసుపత్రికి తరలించి వైద్యం చేయిస్తున్నారు. ఖాకీ చొక్కా మాటున అన్యాయాన్ని, అక్రమాన్ని తొక్కిపడేసే కర్కశత్వమే కాదు.. సాటి మనుషుల్ని కాపాడే మానవత్వం కూడా ఉంటుందని మరోసారి నిరూపించారు.

ఇదీ చదవండి: కరోనా పంజా: దేశంలో ఒక్కరోజే 90,632 కేసులు