లాక్డౌన్ సమయంలో తలసేమియా వ్యాధితో బాధపడుతున్న బాలికకు సహాయం చేసి ఆదుకోవాలని ఎండీఆర్ ఫౌండేషన్ ట్విట్టర్లో అభ్యర్థన చేసిన మేరకు మున్సిపల్ శాఖ మంత్రి కేటీఆర్ స్పందించారు. సంగారెడ్డి జిల్లా పటాన్ చెరు అంబేడ్కర్ కాలనీకి చెందిన వైష్ణవి అనే ఐదోతరగతి చదువుతున్నబాలిక చిన్న నాటి నుంచి తలసేమియా వ్యాధితో బాధపడుతోంది. ప్రతి 20 రోజులకు ఒకసారి ఆ బాలికకు తండ్రి రక్తమార్పిడి చేయించేవారు. లాక్డౌన్ వల్ల తండ్రి పెంటేష్కు పెయింటర్ పని దొరక్క ఇబ్బందులు ఎదురవడం వల్ల బాలికను తీసుకెళ్లేందుకు డబ్బులు లేక ఇబ్బందులు పడుతున్నాడు. ఈ నేపథ్యంలో తెలుసుకున్న ఎండీఆర్ ఫౌండేషన్ అధ్యక్షులు దేవేందర్ రాజు ఆమె తల్లి సంగీతకు రూ.2 వేలు ఆర్థిక సహాయం అందించి బాలిక బంధువు అయిన నర్సింగ్ చేత మంత్రి కేటీఆర్‌కు ట్విట్టర్లో అభ్యర్ధన పెట్టించారు.
దీనికి స్పందించిన మంత్రి కేటీఆర్ బాధిత బాలికకు మెరుగైన వైద్యం అందించాలని జిల్లా పాలనాధికారి హనుమంతరావుకు సూచించారు. దీనితో ఆయన స్థానిక తహసీల్దార్ మహిపాల్ రెడ్డి, గిర్దవార్ రాజును పంపించి వారి పరిస్థితిని విచారించి తెలుసుకున్నారు. డీఎంహెచ్వో దృష్టికి తీసుకెళ్లి సంగారెడ్డిలో వైద్యం అందేలా చూస్తానని పాలనాధికారి స్థానిక అధికారుల ద్వారా వారికి తెలిపారు. బాలిక తల్లిదండ్రులు రాజేంద్రనగర్లో ఆరాంఘడ్ ఆసుపత్రిలో తమ కూతురిని చూపిస్తున్నామని తెలిపారు. ప్రస్తుతం సంగారెడ్డి వెళ్లి రక్తమార్పిడి చేయించుకున్నా... మళ్లీ మందులకు, వైద్యం కోసం రాజేంద్రనగర్‌కు వెళ్లాల్సి వస్తోందని అందువల్లే అక్కడికే వెళ్లేందుకు వారు సుముఖత చూపారు. ఆ నివేదికను జిల్లా పాలనాధికారికి పంపనున్నట్లు తహశీల్దార్ తెలిపారు. అలాగే వారికి 10 కిలోల బియ్యం, నిత్యవసరాలు అందించారు. బాలిక వెళ్లేందుకు ప్రతిసారి రవాణా సౌకర్యం ఏర్పాటు చేస్తానని ఎమ్మెల్యే మహిపాల్‌రెడ్డి తెలిపారు.
ఇవీ చూడండి: లాక్డౌన్ తర్వాత పరిశ్రమలు యథావిధిగా నడవాలి: కేటీఆర్
