రైతు ఆనందానికి వేదికైంది... నగరవాసికి కానుకైంది!

ఆహారం పండించే అన్నదాతకు.. తినే వినియోగదారునిది విడదీయరాని బంధం. కానీ ఆరుగాలం శ్రమించి పండించిన తన పంటను ఎవరు తింటున్నారో రైతుకు తెలియదు. తన కడుపు నింపుతున్న ధాన్యం ఎవరు.. ఎక్కడ.. ఎలా పండించారో తినేవారికి తెలియదు. అయితే అన్నదాతను, వినియోగదారున్ని అనుసంధానం చేసింది డీడీఎస్. మూడేళ్ల క్రితం ప్రారంభమైన ఈ కార్యక్రమం విజయవంతంగా ముందుకుసాగుతోంది.

సంగారెడ్డి జిల్లా జహీరాబాద్ ప్రాంతంలో గత 35 ఏళ్లుగా డీడీఎస్ సేంద్రీయ విధానంలో పాత పంటల సాగును ప్రోత్సహిస్తోంది. చిరుధాన్యాలు సాగు చేసే రైతులకు అండగా నిలుస్తోంది. ఇందులో భాగంగా అన్నదాతలకు పంటల సాగుకు పెట్టుబడి సమకూర్చడంతో పాటు.. వారు పండించే పంట కొనుగోలుకు భరోసా ఇచ్చేలా 2018లో బీయాండ్ ఆర్గానిక్ అన్న కార్యక్రమాన్ని రూపొందించింది. ఇందులో భాగంగా ఆసక్తి ఉన్న వినియోగదారులను రైతుల వద్దకే తీసుకువస్తోంది. వారు పంటల సాగుకు ముందే రైతులకు పెట్టుబడి సాయం అందిస్తున్నారు. దానికి ప్రతిగా తమ పొలంలో పండిన పంటలను రైతులు వారికి అందిస్తున్నారు.

రైతులకు పెట్టుబడి సాయం

జహీరాబాద్​లోని అర్జున్ నాయక్ తండాను ఎంపిక చేసిన డీడీఎస్.. సేంద్రీయ విధానంలో చిరుధాన్యాలు సాగుచేసే రైతులకు... ఎకరాకు పది వేల రూపాయల సాయాన్ని వినియోగదారుల ద్వారా ఏటా అందిస్తోంది. ఇలా ముందుగా అందిన సాయంతో రైతులు విత్తనాలు, ఎరువుల కొనుగోలు, కూలీలు వంటి ఖర్చులను తీర్చుకుంటున్నారు. గతంలో తాము పెట్టుబడి కోసం వడ్డీకి అప్పు తెచ్చేవాళ్లమని.. ఇప్పుడు తమకు ఆ బాధలు తప్పాయని అన్నదాతలు సంతోషం వ్యక్తం చేస్తున్నారు.

వినియోగదారునితో రైతును అనుసంధానం

పెట్టుబడి అందించిన వినియోగదారులకు తమ పొలంలో ఖరీఫ్, రబీలో పండిన పంటలను అన్నదాతలు అందిస్తారు. ఇందులో భాగంగా డీడీఎస్ ప్రధాన కేంద్రం పస్తాపూర్​లో సుగ్గి పండగ పేరుతో కార్యక్రమం నిర్వహించారు. తమ భూమిలో పండిన రాగులు, కొర్రలు, పెసర్లు, మినుములు ఇలా 11రకాల పంటలను రైతులు వినియోగదారులకు అందించారు. రైతుల నుంచి నేరుగా పంటలు తీసుకోవడం బాగుందని వినియోగదారులు అంటున్నారు. మార్కెట్‌లో దొరికే ధాన్యం కంటే నాణ్యమైన, రుచికరమైనవి పొందగల్గుతున్నామని సంతృప్తి వ్యక్తం చేస్తున్నారు. పంట పండించే అన్నదాతను.. తినే వినియోగదారున్ని అనుసధానం చేసిన డీడీఎస్ ప్రయత్నాన్ని ప్రతి ఒక్కరూ అభినందిస్తున్నారు.

ఇవీచూడండి: కశ్మీర్​లో ఇద్దరు తెలుగు జవాన్ల వీరమరణం