గ్రామాల్లో అసాంఘిక కార్యక్రమాలకు పాల్పడే వ్యక్తులపై ఉక్కుపాదం మోపుతామని డీసీపీ రవీందర్ హెచ్చరించారు. చట్ట వ్యతిరేక పనులు చేసేవారికి సహకరించవద్దని ప్రజలకు సూచించారు. పెద్దపల్లి జిల్లా ముత్తారం మండలం మచ్చుపేట పంచాయతీ పరిధిలోని శుక్రవారంపేట గ్రామంలో ఏసీపీ ఉమేందర్, మంథని సీఐ ఆకునూరి మహేందర్తో కలిసి కార్డన్ సెర్చ్ నిర్వహించారు. ఒకప్పుడు మావోయిస్టులకు అనువుగా ఉంటూ... అటవీ ప్రాంతానికి దగ్గరలో ఉన్న గ్రామానికి ఒకేసారి భారీ ఎత్తున పోలీసు బలగాలు రావడంతో ప్రజలు భయాందోళనకు గురయ్యారు.
పల్లెల్లో ప్రశాంత వాతావరణం నెలకొల్పడం కోసమే కార్డన్ సెర్చ్ నిర్వహిస్తున్నట్లు డీసీపీ తెలిపారు. పోలీసు సిబ్బంది ఇంటింటా తనిఖీలు నిర్వహించారు. గ్రామస్థులెవరూ ఆందోళన చెందవద్దని పోలీసులు సూచించారు. గ్రామాల్లో యువత చెడు వ్యసనాలకు బానిసలు కాకుండా ఉపాధి వైపు దృష్టి సారించాలన్నారు. పోటీ పరీక్షలకు సిద్ధమయ్యే వారికోసం పోలీస్శాఖ ఆధ్వర్యంలో శిక్షణ ఇస్తామని వెల్లడించారు. గ్రామాల్లోకి కొత్తవారు వచ్చినా... అనుమానాస్పదంగా ఎవరైనా కనిపించినా వెంటనే పోలీసులకు సమాచారం అందించాలని పేర్కొన్నారు. ఈ కార్యక్రమంలో మంథని, రామగిరి ఎస్సైలు ఓంకార్ యాదవ్, మహేందర్ యాదవ్, పోలీసు సిబ్బంది పాల్గొన్నారు.
