నామపత్రాలు దాఖలు చేసిన భాజపా అభ్యర్థి రవికుమార్

నాగార్జునసాగర్​ అసెంబ్లీ నియోజకవర్గ ఉపఎన్నికకు ప్రధాన పార్టీల అభ్యర్థులు నామినేషన్లు దాఖలు చేశారు. ఇప్పటివరకు ప్రధానపార్టీలు, స్వతంత్రులతో కలిసి సుమారు 30 మంది నామపత్రాలు దాఖలు చేశారు. చివరి రోజున తెరాస, కాంగ్రెస్​ పార్టీల అభ్యర్థులు నామినేషన్​ వేయగా... భాజపా అభ్యర్థి పానుగోతు రవికుమార్​ నామపత్రాలు దాఖలు చేశారు.

నాగార్జునసాగర్​ అసెంబ్లీ నియోజకవర్గ ఉపఎన్నికకు భాజపా అభ్యర్థి పానుగోతు రవికుమార్​ నామినేషన్​ దాఖలు చేశారు. రవికుమార్​ వెంట గోషామహల్​ ఎమ్మెల్యే రాజాసింగ్​ ఉన్నారు. జనరల్​ స్థానంలోనూ... ఒక ఎస్టీకి టికెట్​ ఇచ్చి భాజపా మార్పునకు శ్రీకారం చుట్టిందని రవికుమార్​ తెలిపారు. ఇప్పటివరకు ఎస్టీల ఓట్లు దండుకున్నారే తప్పా... ఒక్క పార్టీ కూడా అవకాశం ఇవ్వలేదని మండిపడ్డారు. ఈసారి నాగర్జునసాగర్​లో వంద శాతం భాజపా జెండానే ఎగురుతుందని పేర్కొన్నారు.

ఉప ఎన్నికలో పోటీ చేసేందుకు చాలా మంది టికెట్‌ ఆశించినా... డాక్టర్ పనుగోతు రవికుమార్‌వైపే భాజపా మొగ్గు చూపింది. తమ అభ్యర్థిగా రవికుమార్​ను నిన్న అధికారికంగా ప్రకటించగా... ఈరోజు బీ ఫామ్​ ఇచ్చింది.

ఇదీ చూడండి: నామినేషన్ వేసిన జానారెడ్డి, నోముల భగత్​