కష్టాల్లో గురువు... అండగా నిలిచిన పూర్వ విద్యార్థులు

తమకు విద్యాబుద్ధులు నేర్పిన గురువు ఆర్థిక ఇబ్బందుల్లో ఉన్నాడని తెలుసుకున్న ఆ విద్యార్థులు వారి గురువుకు ఏదో చేయాలని తపించారు. పూర్వ విద్యార్థులు చేయి చేయి కలిపి విద్యాబుద్ధులు నేర్పిన గురువుకి అండగా నిలిచారు.

జగిత్యాల జిల్లా కథలాపూర్ మండలం పోతారానికి చెందిన రఘు ఉపాధ్యాయుడు. ఓ ప్రైవేటు స్కూల్​తో పాటు అక్కడి ప్రభుత్వ పాఠశాలలో పార్ట్ టైం ఉపాధ్యాయుడిగా పనిచేసేవాడు. 1993లో సిరిసిల్ల జిల్లా రుద్రాంగిలోని ఓ ప్రైవేట్​ స్కూల్​లో టీచర్​గా జీవనం ప్రారంభించిన ఆయన మొన్నటి వరకు ఓ ప్రైవేటు స్కూల్​లో విధులు నిర్వర్తించాడు.

చేయూత..

అతని దగ్గర విద్యాబుద్ధులు నేర్చుకున్న విద్యార్థులు ఉన్నత స్థానాల్లో నిలిచారు. ప్రస్తుతం దేశ, విదేశాల్లో వివిధ రంగాల్లో ఉద్యోగాలు చేస్తున్నారు. గురువు కుటుంబం ఆర్థిక ఇబ్బందులు పడుతున్న విషయాన్ని తెలుసుకున్న 1997- 98 పదో తరగతి పూర్వ విద్యార్థులు ఆయనకు బాసటగా నిలిచారు. విద్యాబోధన నేర్పిన గురువుకు ఉపాధి కల్పించాలని నిర్ణయించుకున్నారు. వారందరూ... కలిసి ఆ గురువు దగ్గరికి వెళ్లి విషయం చెప్పారు. టిఫిన్ సెంటర్​తో పాటు చికెన్ సెంటర్ ఏర్పాటు చేయిస్తే తమ కుటుంబాన్ని పోషించుకుంటానని గురువు పూర్వ విద్యార్థులకు తెలిపాడు.

ఇతరులకు స్ఫూర్తి...

అందరూ కలిసి కథలాపూర్ మండలం అంబారిపేట క్రాసింగ్ వద్ద ఓ షెడ్డు నిర్మించి టిఫిన్ సెంటర్, చికెన్ సెంటర్ ఏర్పాటు చేసి అందుకు కావాల్సిన సామగ్రిని అందజేసి ఇవాళ ప్రారంభించారు. పూర్వ విద్యార్థులు.. ఆపదలో ఉన్న తనను ఆదుకోవడం చాలా ఆనందంగా ఉందని రఘు చెబుతున్నాడు. మా గురువు వల్లే ఈ స్థాయిలో ఉన్నామని.. లేకుంటే మేము ఈ స్థాయిలో ఉండేది కాదని పూర్వ విద్యార్థులు అన్నారు. కష్టాల్లో గురువుకు అండగా నిలిచిన విద్యార్థులు ఇతరులకు స్ఫూర్తిగా నిలిచారు.