గ్రామ అభివృద్ధి కమిటీలను రద్దు చేయాలని జగిత్యాల జిల్లా మెట్పల్లి మండలం ఆత్మనగర్ గ్రామ పంచాయితీ సర్పంచ్ శ్రీనివాస్ హరే కృష్ణ.. నిరహార దీక్ష చేపట్టారు. రామలచ్చకపేట్ గ్రామానికి చెందిన కొందరు వ్యక్తులు తాము వీడీసీ సభ్యులమని... రైతులు శ్రీరామ్ సాగర్ వరద కాల్వ ద్వారా చెరువులకు, పొలాలకు నీరు తీసుకున్నందున 50 వేల రూపాయలు ఇవ్వాలని వేధిస్తున్నట్లు ఆందోళన వ్యక్తం చేశారు. లేకపోతే వరద కాల్వ నుంచి మోటర్ల తీసివేస్తామని బెదిరిస్తున్నట్లు ఆవేదన వ్యక్తం చేశారు.
కఠిన చర్యలు తీసుకోవాలి...
రైతులకు న్యాయం జరగాలంటే రామలచ్చక్కపేట గ్రామ అభివృద్ధి కమిటీ సభ్యులపై గట్టి చర్యలు తీసుకోవాలని సర్పంచ్ స్పష్టం చేశారు. స్పందించిన మెట్పల్లి వ్యవసాయ మార్కెట్ కమిటీ ఛైర్మన్ సర్పంచ్ దీక్షకు సంఘీభావం తెలిపి విరమింపజేశారు.
చర్యలు తీసుకుంటాం ...
విషయం కోరుట్ల ఎమ్మెల్యే కల్వకుంట్ల విద్యాసాగర్ రావు దృష్టికి వెళ్ళగా వీడీసీ నిర్మూలనకు చర్యలు తీసుకుంటామని హామీ ఇచ్చినట్లు సర్పంచ్ శ్రీనివాస్ హరే కృష్ణ వివరించారు. స్థానిక పోలీస్ స్టేషన్లో వీడీసీ సభ్యులపై కేసు నమోదైందని... ఇప్పుడు కేసును ఉపసంహరించుకోవాలంటూ కమిటీ రాయబారాలు చేస్తోందని ఆయన తెలిపారు.
అసలు వీడీసీలు ఉండకూడదు...
భవిష్యత్లో ఏ గ్రామంలోనూ రైతులకు, మత్స్య సొసైటీ చెరువులకు, గంగపుత్రులకు నీటిపై వేధింపులు ఉండకూడదంటే వీడీసీలు రద్దు కావాలని సర్పంచ్ వివరించారు. డబ్బుల పేరిట ఇబ్బందులకు గురిచేసే గ్రామ అభివృద్ది కమిటీని రద్దు చేసే వరకు పోరాటం కొనసాగిస్తామని ఆయన స్పష్టం చేశారు. కార్యక్రమంలో ఉపసర్పంచ్ చిలివేరి విజయ్, గ్రామ యువత, మహిళలు , స్థానికులు పెద్ద ఎత్తున పాల్గొన్నారు.
ఇవీ చూడండి : సీమ ఎత్తిపోతలపై తెలంగాణ వాదనలు వినేందుకు ఎన్జీటీ అంగీకారం
