అందుబాటులోకి ఐదు ఆన్​లైన్​ రవాణా సేవలు

ప్రజలకు చేరువయ్యేలా మరిన్ని ఆన్‌లైన్‌ సేవలను రాష్ట్ర రవాణా శాఖ అందుబాటులోకి తీసుకొచ్చింది. ఫెస్ట్‌ పేరుతో హైదరాబాద్‌లోని రవాణాశాఖ కార్యాలయంలో మంత్రి పువ్వాడ అజయ్ కుమార్ ఈ సేవలను ప్రారంభించారు. వీటి ద్వారా ఐదు రకాల ఆన్ లైన్ సేవలు అందుబాటులోకి రానున్నాయి. ప్రజల సమయం వృథా కాకుండా... పారదర్శకత కోసం ఈ విధానం తీసుకొచ్చినట్లు మంత్రి స్పష్టం చేశారు.

డిజిటల్ తెలంగాణలో భాగంగా రవాణా శాఖ ఆన్‌లైన్‌ సేవలను అందుబాటులోకి తీసుకొచ్చింది. డూప్లికేట్ లెర్నింగ్ లైసెన్స్, డూప్లికేట్ లైసెన్స్, బాడ్జ్​లు అందజేయడం, డ్రైవింగ్ లైసెన్స్ హిస్టరీ షీట్, పాత కార్డ్ స్థానంలో కొత్త స్మార్ట్ కార్డ్‌లు ఇవ్వడం వంటి ఐదు రకాల సేవలను రవాణా శాఖ మంత్రి పువ్వాడ అజయ్ కుమార్ ప్రారంభించారు. ప్రస్తుతం ఐదు సేవల్ని ఆన్​లైన్ ద్వారా అందిస్తున్నామని... మరో 6 సేవలను మరికొద్ది రోజుల్లో అందుబాటులోకి తీసుకొస్తామని ఆయన వివరించారు. ఆర్టిఫిషియల్ ఇంటలిజెన్స్‌తో పనిచేసే ఈ సేవలను మొబైల్​లో పొందవచ్చని పేర్కొన్నారు. తెలంగాణ ఆవిర్భావం తర్వాత అనేక సంస్కరణలు వచ్చాయన్న మంత్రి పువ్వాడ... కేటీఆర్ జన్మదినం సందర్భంగా దేశంలోనే తొలిసారిగా రవాణశాఖలో ఆన్‌లైన్‌ సేవలు ప్రారంభించడం గర్వంగా ఉందన్నారు.

ఎం-గవర్నెన్స్, టి-యాప్​ ఫోలియో ద్వారా ఫెస్ట్ సేవలు

ఎం-గవర్నెన్స్, టి-యాప్​ ఫోలియో ద్వారా ఈ ఫెస్ట్ సేవలు పనిచేస్తాయి. ఇందులో పౌరుడి పేరు, తండ్రి పేరు, చిరునామా, డీఎల్​ఎల్​ నంబర్ నమోదు చేయటంతోపాటు, సెల్ఫీ దిగి... అవసరమైన పత్రాలు అప్​లోడ్ చేయాల్సి ఉటుంది. అత్యాధునికమైన సాంకేతిక పరిజ్ఞానంతో ఇది పని చేస్తోంది. ఆర్టిఫిషియల్ ఇంటలిజెన్స్ సహాయంతో లైవ్‌నెస్ చెక్ వల్ల సెల్ఫీ ఫోటోలను ఇది పరీక్షిస్తుంది. ఇదే... ఇందులో అతి ముఖ్యమైన పరీక్ష. ఆ తర్వాత దరఖాస్తుదారుడి పేర్లలో ఉన్న స్వల్ప తేడాలు, వ్యత్యాసాలు తనిఖీ చేస్తోంది. డీప్ లెర్నింగ్ బేస్ట్ ఇమేజ్​తో ఫొటోలో ఉన్న వైవిద్యాలను ఈ సాంకేతికత పరిజ్ఞానంతో పరిశీలిస్తోందని మంత్రి పువ్వాడ అజయ్ కుమార్ పేర్కొన్నారు. వినియోగదారుడి వాహనం భౌతిక తనిఖీ పరీక్షలు మినహా... మిగిలిన సేవలన్ని వినియోగదారులకు ఆన్‌లైన్‌ ద్వారా అందించేందుకు రవాణాశాఖ కృషి చేస్తోందని అధికారులు పేర్కొన్నారు.

ఇదీ చదవండి: ఎండమావిగా మారిన 'సత్వర'న్యాయం