'ప్రణాళిక ప్రకారమే చివరిక్షణంలో తొలగించారు'

తెరాస తనకు టికెట్​ నిరాకరించడం పట్ల ఆ పార్టీ నేత గడ్డం వివేక్​ ఆవేదనలో ఉన్నారు. పార్టీ కోసం మేలు చేయడం తాను చేసిన తప్పా అని ప్రశ్నించారు.

ప్రణాళిక ప్రకారమే చివరిక్షణంలో తనకు పెద్దపల్లిటికెట్​ నిరాకరించారని గడ్డం వివేక్​ పేర్కొన్నారు. పెద్దపల్లి పార్లమెంటు నియోజకవర్గానికి తెరాస అభ్యర్థిగా మొదట తన పేరు ఖరారు చేసి...తర్వాత వెంకటేశ్ నేతకానికి టికెట్​ ఇచ్చారని ఆరోపించారు. దీనిపై గడ్డం వివేక్ తీవ్ర ఆవేదనకు గురయ్యారు.

పార్టీకి వ్యతిరేకంగా పోటీచేసిన వ్యక్తికి టికెట్​ ఇచ్చారని వెల్లడించారు. తన తండ్రి, తానూ తెలంగాణ సాధనే లక్ష్యంగా రాజీలేని పోరాటం చేశామని గుర్తుచేశారు. తెలంగాణ మేలు కోసం కేసీఆర్ ఆహ్వానిస్తేనే పార్టీలోకి వచ్చానని స్పష్టం చేశారు. ఎన్ని ఒత్తిళ్లు వచ్చినా లొంగకుండా పోరాడటమే నేరమా అని ప్రశ్నించారు. పార్టీ బలహీనంగా ఉన్నచోట పటిష్ఠం చేశానని తెలిపారు.

టికెట్ హామీ ఇచ్చినా... పెద్దపల్లికి దూరంగా ఉంచడానికే కొందరు పనిచేశారని ఆగ్రహం వ్యక్తం చేశారు. ప్రభుత్వ సలహాదారుగా ఎలాంటి ప్రయోజనాలు పొందలేదని చెప్పుకొచ్చారు. ఆ పదవి వల్లే హైదరాబాద్ క్రికెట్ సంఘం అధ్యక్షుడి పదవి కోల్పోయానని వాపోయారు. జీవితాంతం తెలంగాణ ప్రజల మేలు కోసం పనిచేస్తూనే ఉంటానని ప్రకటించారు.

ఇదీ చూడండి: చివరిరోజు కోలాహలం.. ముగిసిన నామినేషన్ల పర్వం