Alleti Maheshwar Reddy: కాంగ్రెస్​కు రాజీనామా చేసి.. కమలం గూటికి చేరిన మహేశ్వర్​రెడ్డి

Alleti Maheshwar Reddy resigns to Congress : మాజీ ఎమ్మెల్యే, ఏఐసీసీ కార్యక్రమాల అమలు కమిటీ ఛైర్మన్ ఏలేటి మహేశ్వర్‌రెడ్డి కాంగ్రెస్‌ పార్టీకి రాజీనామా చేసి.. బీజేపీలో చేరారు. ఈ మేరకు తన రాజీనామా లేఖను పార్టీ జాతీయ అధ్యక్షుడు మల్లికార్జున్‌ ఖర్గేకు పంపించారు. తన రాజీనామా అనంతరం దిల్లీలో బీజేపీ ముఖ్య నేతలతో ఆయన భేటీ అయి.. కాషాయ కండువా కప్పుకున్నారు.

Alleti Maheshwar Reddy resigns to Congress : ఏఐసీసీ కార్యక్రమాల అమలు కమిటీ ఛైర్మన్ ఏలేటి మహేశ్వర్ రెడ్డికి కాంగ్రెస్ క్రమశిక్షణ కమిటీ షోకాజ్​ నోటీసులు జారీ చేసిన సంగతి తెలిసిందే. పార్టీ వ్యతిరేక కార్యకలాపాలకు పాల్పడుతున్నట్లు, బీజేపీ పార్టీకి సన్నిహితంగా ఉంటున్నట్లు వచ్చిన ఫిర్యాదుల ఆధారంగా ఈ నోటీసులు జారీ చేశారు. అయితే ఈ నోటీసులపై బుధవారం రోజున స్పందించిన మహేశ్వర్‌రెడ్డి.. ఏఐసీసీ కార్యక్రమాల అమలు కమిటీ ఛైర్మన్ అయిన తనకు షోకాజ్ నోటీసు ఇచ్చే అర్హత పీసీసీకి లేదన్నారు. సోషల్ మీడియాలో ఏదో వస్తే దానికి తానెలా బాధ్యత వహిస్తానని మండిపడ్డారు. ఈ విషయాన్ని పార్టీ జాతీయ అధ్యక్షుడు ఖర్గే వద్దే తేల్చుకుంటానని స్పష్టం చేశారు. ఈ మేరకు నేడు దిల్లీ వెళ్లారు.

ఈ క్రమంలోనే మహేశ్వర్‌రెడ్డి నేడు కాంగ్రెస్ పార్టీకి రాజీనామా చేశారు. ఆ లేఖను ఏఐసీసీ అధ్యక్షుడు ఖర్గేకు పంపించారు. తీవ్ర మనస్తాపంతో పార్టీని వీడుతున్నానన్న ఆయన.. ఇప్పటికిప్పుడు పార్టీ మారే ఉద్దేశం లేదని స్పష్టం చేశారు. ఈ నెల 26 తర్వాత భవిష్యత్‌ కార్యాచరణ ప్రకటిస్తానని తెలిపారు. ఇవాళ తనను ఎవరు ఆహ్వానించినా.. వారిని కలుస్తానని మహేశ్వర్‌రెడ్డి చెప్పారు. ఇంతలోనే ఇలా బీజేపీలో చేరారు.

''తీవ్ర మనస్తాపంతో కాంగ్రెస్ పార్టీకి రాజీనామా చేశా. ఇప్పటికిప్పుడు పార్టీ మారే ఉద్దేశం లేదు. ఈ నెల 26 తర్వాత పార్టీ మార్పుపై నిర్ణయం తీసుకుంటా. ఇవాళ నన్ను ఎవరు ఆహ్వానించినా వారిని కలుస్తా.'' - మహేశ్వర్‌రెడ్డి, ఏఐసీసీ కార్యక్రమాల అమలు కమిటీ ఛైర్మన్

ఖర్గే అపాయింట్‌మెంట్‌ కోసం ప్రయత్నం..: దిల్లీలో ఉన్న మహేశ్వర్‌రెడ్డి రాజీనామాకు ముందు కాంగ్రెస్ పార్టీ జాతీయ అధ్యక్షుడు మల్లికార్జున్ ఖర్గే అపాయింట్‌మెంట్ కోసం ప్రయత్నించారు. ఖర్గేతో మాట్లాడి భవిష్యత్‌ నిర్ణయం ప్రకటిస్తానని చెప్పారు. అయితే ఖర్గేను కలిసే అవకాశం రాకపోవడంతో రాజీనామా చేస్తున్నట్లు ప్రకటించారు.

కాంగ్రెస్​ పార్టీకి రాజీనామా.. బీజేపీలో చేరిక : అనంతరం మహేశ్వర్‌రెడ్డి.. బీజేపీ రాష్ట్ర వ్యవహారాల ఇంఛార్జ్ తరుణ్‌ చుగ్‌ నివాసానికి వెళ్లారు. ఆ పార్టీ రాష్ట్ర అధ్యక్షుడు బండి సంజయ్‌, ఎమ్మెల్యే ఈటల రాజేందర్‌తో కలిసి దిల్లీలోని తరుణ్‌ చుగ్‌ నివాసంలో ఆయనతో సమావేశమయ్యారు. అక్కడి నుంచి తరుణ్‌చుగ్‌, బండి సంజయ్‌, ఈటలతో కలిసి ఆ పార్టీ జాతీయ అధ్యక్షుడు జేపీ నడ్డాతో భేటీ అయ్యారు. అనంతరం బీజేపీ జాతీయ అధ్యక్షుడు జేపీ నడ్డా సమక్షంలో కాషాయం కండువా కప్పుకున్నారు.

ఇవీ చూడండి..