టీ20 ప్రపంచకప్లో రెండు వరుస ఓటములతో అభిమానుల్ని నిరాశకు గురిచేసింది టీమ్ఇండియా. తొలి మ్యాచ్లో దాయాది పాక్ చేతిలో ఓడిన కోహ్లీసేన(ind vs pak t20) రెండో మ్యాచ్లో న్యూజిలాండ్(ind vs nz t20)కు అప్పనంగా విజయాన్ని కట్టబెట్టింది. ఈ రెండు మ్యాచ్ల్లోనూ అటు బ్యాట్తో పాటు బంతితోనూ సమష్టిగా విఫలమయ్యారు భారత ఆటగాళ్లు. అయితే ఈ మ్యాచ్లో కోహ్లీసేన చేసిన కొన్ని మార్పులు బెడిసికొట్టాయి. దీంతో ఒక్క మ్యాచ్ ఓటమితోనే జట్టులో మార్పులు ఎందుకు చేశారంటూ కొందరు ప్రశ్నిస్తుండగా.. మరికొందరు బ్యాటింగ్ ఆర్డర్ను మార్చడం సరికాదని అభిప్రాయపడుతున్నారు. మొత్తంగా కివీస్పై భారత్ ఓడిన అనంతరం ఎవరేమన్నారో చూద్దాం.
- ఏ రకమైన ఆలోచనా దృక్పథంతో టీమ్ఇండియా ఆడుతుందో అర్థం కావట్లేదు. రోహిత్ను 3వ స్థానంలో దించడమేంటి? ఇషాన్ ఓపెనర్గా రావాల్సిన అవసరం ఏంటి? హార్దిక్ పాండ్యా చాలా ఆలస్యంగా బౌలింగ్ చేశాడు. అతడు తొలి ఓవర్లలో బౌలింగ్ చేస్తే బాగుండేది. భారత్ గేమ్ ప్లాన్ ఏంటో అంతుచిక్కడం లేదు. భారత బౌలింగ్ దళం బలహీనంగా ఉందని మరోసారి రుజువైంది - షోయబ్ అక్తర్, పాక్ మాజీ క్రికెటర్
- ఈ మ్యాచ్ క్వార్టర్ ఫైనల్తో సమానం. జట్టు మానసికంగా దృఢంగా కనిపించడం లేదు. ఇలాంటి మ్యాచ్ల్లో గెలవాలనే కసితో వెళ్లి తప్పులు చేయొద్దు. ద్వైపాక్షిక సిరీస్ల్లో పొరపాట్లు దొర్లుతాయి. కానీ ప్రపంచకప్ లాంటి టోర్నీలో తప్పులు జరగకూడదు. - గంభీర్, భారత మాజీ క్రికెటర్
- మ్యాచ్ మొదలవకముందే న్యూజిలాండ్.. భారత్పై ఆధిపత్యం వహించింది. టాస్కు ముందే టీమ్ఇండియా ఒత్తిడిలో కూరుకుపోయిందని ఎంచుకున్న జట్టును బట్టి చెప్పవచ్చు. రాహుల్, ఇషాన్ ఓపెనర్లుగా రావడం ఆశ్చర్యపరిచింది. అలాగే రోహిత్ మూడు, కోహ్లీ నాలుగో స్థానాల్లో రావడమూ ఆశ్చర్యమే. టాపార్డర్లో ఉత్తమ ఆటగాళ్లు ఉండాలి. ఎందుకంటే టీ20ల్లో కేవలం 120 బంతులు మాత్రమే ఉంటాయి. -అజయ్ జడేజా, భారత మాజీ క్రికెటర్
- బ్యాటింగ్ ఆర్డర్లో భారత జట్టు చేసిన మార్పులు ఫలితాన్నివ్వలేదు. అద్భుత ఆటగాడైన రోహిత్ను మూడో స్థానంలో దించారు. మూడో స్థానంలో విలువైన పరుగులు చేసే కోహ్లీ నాలుగులో దిగాడు. యువ ఆటగాడైన ఇషాన్ కిషన్ను ఓపెనర్గా పంపారు. ఇషాన్ హిట్ అండ్ మిస్ ప్లేయర్. అతిడిని 4 లేదా 5లో పంపొచ్చు. అప్పుడు పరిస్థితిని బట్టి అతడు ఆడతాడు. రోహిత్ను 3లో పంపడం వల్ల అతడి ఆత్మస్థైర్యం దెబ్బతింటుంది. మార్పులు ఫలితాన్ని ఇస్తే బాగుండేది. కానీ విఫలమైనపుడు విమర్శలు తప్పవు. -గావస్కర్, భారత మాజీ ఆటగాడు
- రోహిత్ లాంటి ఆటగాడి బ్యాటింగ్ ఆర్డర్ మార్చడం చాలా తప్పు. చాలా ఏళ్లుగా అతడు ఓపెనర్గా సేవలందిస్తున్నాడు. దీని వల్ల జట్టు బ్యాటింగ్ ఆర్డర్లో చాలా మార్పులు చేయాల్సి వచ్చింది. -మదన్లాల్, భారత మాజీ ఆటగాడు
