కరోనా దెబ్బకు టోర్నీలు రద్దు.. మరికొన్ని వాయిదా!

కరోనా వైరస్​ కారణంగా ప్రపంచవ్యాప్తంగా అనేక క్రీడా టోర్నీలు రద్దయ్యాయి. మరికొన్ని వాయిదా పడ్డాయి. ఈ నేపథ్యంలో భారత్​లో జరగబోయే కొన్ని టోర్నీలపై ఈ ప్రభావం పడింది.

ప్రపంచాన్ని కుదిపేస్తున్న కరోనా వైరస్​ ప్రభావం భారత్​పైనా కనిపిస్తోంది. ఇప్పటికే కొన్ని దేశాల్లో క్రీడా టోర్నీలను పూర్తిగా రద్దు చేయగా.. మరికొన్ని దేశాల్లో ప్రేక్షకులు లేకుండానే మ్యాచ్​లను నిర్వహించేందుకు ప్రణాళికలు రచిస్తున్నారు. ఈ క్రమంలో భారత్​లో జరగాల్సిన కొన్ని క్రీడా టోర్నీలను రద్దు చేయగా.. మరికొన్ని వాయిదా పడ్డాయి.

వ్యాయామ క్రీడలు

• మధ్యప్రదేశ్ రాష్ట్రంలోని భోపాల్​ వేదికగా ఏప్రిల్​ 6-8 తేదీల్లో జరగబోయే ఫెడరేషన్ కప్ జాతీయ జూనియర్ అథ్లెటిక్స్ ఛాంపియన్‌షిప్‌ వాయిదా పడింది.

బ్యాడ్మింటన్

• దిల్లీలో మార్చి 24 నుంచి 29 వరకు జరగనున్న ఇండియా ఓపెన్..​ ప్రేక్షకులు లేకుండానే నిర్వహించనున్నారు.

బాస్కెట్​బాల్​

• బెంగళూరు వేదికగా మార్చి 18 నుంచి 22 వరకు నిర్వహించనున్న అంతర్జాతీయ బాస్కెట్​బాల్​ సమాఖ్య నిర్వహించే ఒలింపిక్ అర్హత టోర్నమెంట్ వాయిదా పడింది.

క్రికెట్

• ప్రభుత్వం విధించిన వీసా ఆంక్షల కారణంగా ఏప్రిల్ 15 వరకు ఐపీఎల్​కు విదేశీ ఆటగాళ్లు దూరంగా ఉండనున్నారు.
• టీమిండియా, దక్షిణాఫ్రికా మధ్య ఈనెల 15,18 తేదీల్లో లఖ్​నవూ, కోల్‌కతాలో వన్డే సిరీస్ ప్రేక్షకులు లేకుండా జరగనుంది.

• రంజీట్రోఫీ ఫైనల్​ చివరిరోజు ప్రేక్షకులు లేకుండా ఆట సాగనుంది.

• ముంబయి, పుణెలలో ఈనెల 22 వరకు జరగనున్న 'రోడ్ సేఫ్టీ వరల్డ్ సిరీస్' రద్దు చేశారు.

ఫుట్​బాల్​

• ఏటీకె ఫుట్​బాల్​ క్లబ్​, చెన్నయిన్ ఫుట్​బాల్​ క్లబ్ మధ్య ఇండియన్ సూపర్ లీగ్ ఫైనల్ గోవాలో ఈనెల 14న జరగనుంది. ప్రేక్షకులు లేకుండానే ఈ మ్యాచ్​ జరగనుంది.

• ఈనెల 26న భువనేశ్వర్‌లో భారత్, ఖతార్ మధ్య జరగాల్సిన ఫిఫా ప్రపంచకప్ క్వాలిఫయర్ మ్యాచ్ వాయిదా పడింది.

• జూన్​ 9న కోల్‌కతా వేదికగా భారత్, అఫ్గానిస్థాన్ మధ్య జరగనున్న ఫిఫా ప్రపంచకప్ క్వాలిఫయర్​ మ్యాచ్ వాయిదా పడింది.

• ఏప్రిల్ 14 నుంచి 27 వరకు మిజోరాంలో జరగనున్న సంతోష్ ట్రోఫీ తుది రౌండ్ మ్యాచ్​లు వాయిదా పడ్డాయి.

• ఐ-లీగ్​లోని 28 మ్యాచ్‌లు ఖాళీ స్టేడియాల్లో జరగనున్నాయి.

గోల్ఫ్​

• ఈ నెల 19 నుంచి 22 వరకు హర్యానా వేదికగా జరగనున్న ఇండియా ఓపెన్​ గోల్ఫ్​ టోర్నీ వాయిదా పడింది.

పారాస్పోర్ట్స్​

• పారా క్రీడలకు సంబంధించిన అన్ని జాతీయ, రాష్ట్ర ఛాంపియన్‌షిప్‌ టోర్నీలు ఏప్రిల్ 15 వరకు వాయిదా పడ్డాయి.

షూటింగ్​

• ఈనెల 15 నుంచి 25 వరకు జరగనున్న రైఫిల్​, పిస్టల్​, షార్ట్​గన్​ ప్రపంచకప్​ పోటీలను వాయిదా వేశారు.

టెన్నిస్​

• భారత్​లో జరగనున్న దేశవాళీ టెన్నిస్​ టోర్నీ​లన్నీ రద్దు చేశారు.

ఇదీ చూడండి.. అలా చేస్తే టోక్యో ఒలింపిక్స్​కు​ అర్హత సాధించలేం!