టోక్యో ఒలింపిక్స్లో హాకీ ఇండియా పురుషుల జట్టు కెప్టెన్గా మిడ్ ఫీల్డర్ మన్ప్రీత్ సింగ్ వ్యవహరించనున్నాడు. ఈ విషయాన్ని హాకీ ఇండియా అధికారికంగా వెల్లడించింది. వైస్ కెప్టెన్లుగా సీనియర్ డిఫెండర్లు బిరేంద్ర లక్రా, హర్మన్ప్రీత్ సింగ్ పేర్లను ప్రకటించింది.
"ఒలింపిక్స్ క్రీడలు ప్రత్యేకమైనవి. అటువంటి గేమ్స్లో పురుషుల హాకీ జట్టును నడిపించే బాధ్యత ఇవ్వడం నాకు దక్కిన గౌరవంగా భావిస్తున్నా. మొత్తంగా ఒలింపిక్స్లో మూడో సారి పాల్గొనబోతున్నా. ఈసారి సారథిగా జట్టును నడిపించనున్నాను. ఈ అవకాశం నాకు గర్వంగా ఉంది. గత కొన్నేళ్లుగా మా టీమ్ బలమైన నాయకత్వమైన సమూహంగా తయారైంది. మహమ్మారి విసిరిన సవాళ్లను విజయవంతంగా అధిగమించి ఈ స్థితికి వచ్చాము. ఒలింపిక్స్లో మంచి ప్రదర్శన చేస్తామని ఆశిస్తున్నా."
-మన్ప్రీత్ సింగ్, భారత హాకీ జట్టు కెప్టెన్.
గత నాలుగేళ్లుగా మన్ప్రీత్ సారథ్యంలో భారత జట్టు కొన్ని మైలురాళ్లను అధిగమించింది. అందులో 2017 ఆసియా కప్తో పాటు 2018 ఆసియన్ ఛాంపియన్స్ ట్రోఫీ, 2019 ఎఫ్ఐహెచ్ సిరీస్ ఫైనల్ను గెలుచుకుంది. 2018లో భువనేశ్వర్ వేదికగా ఎఫ్ఐహెచ్ పురుషుల ప్రపంచకప్లో క్వార్టర్స్కు చేరింది మన్ప్రీత్ సేన. 2020లో జరిగిన ఎఫ్ఐహెచ్ ప్రో లీగ్లోనూ భారత జట్టు మంచి ప్రదర్శనే చేసింది. మన్ప్రీత్ నేతృత్వంలో ర్యాంకింగ్స్లోనూ అత్యుత్తమ స్థితిలో నిలిచింది. ప్రస్తుతం భారత జట్టు నాలుగో ర్యాంకులో ఉంది.
కెప్టెన్సీతో పాటు వైస్ కెప్టెన్లుగా ఎంపికైన ముగ్గురిని అభినందించారు హాకీ కోచ్ గ్రాహం రీడ్. గత కొన్నేళ్లుగా వారు ముగ్గురు జట్టులో కీలక పాత్ర పోషిస్తున్నారని తెలిపారు. ఇద్దరు ఆటగాళ్లను వైస్ కెప్టెన్లుగా ప్రకటించడం వల్ల మన నాయకత్వ బలమేంటో అర్థమవుతుందని పేర్కొన్నారు.
మహిళలకు రాణీ..
ఇక భారత మహిళల హాకీ జట్టు కెప్టెన్గా రాణీ రాంపాల్ వ్యవహరించనుంది. వైస్ కెప్టెన్లుగా దీప్ గ్రేస్, సవిత.. రాణీకి తోడుగా ఉండనున్నారు. గత కొన్నేళ్లుగా రాణీ.. భారత జట్టుకు గుర్తుండిపోయే విజయాలు అందించింది. 2017 ఆసియా కప్తో పాటు, 2018 ఆసియా క్రీడలు, ఆసియా ఛాంపియన్షిప్లో రజతాలు, 2019 ప్రపంచ హాకీ సిరీస్ ఫైనల్లో ట్రోఫీ ఇవన్నీ భారత జట్టును ర్యాంకింగ్లో మెరుగుపరిచాయి.
ఇదీ చదవండి: 'షెడ్యూల్ ప్రకారం ఒలింపిక్స్ జరిగితే పతకం ఖాయం!'
