Rohit Sharma World Cup 2023 : 'అందరూ మా గురించే మాట్లాడుతున్నారు. అతన్ని అడగరేం'

Rohit Sharma World Cup 2023 : రానున్న ప్రపంచ్​ కప్​కు టీమ్​ఇండియాను ముందుండి నడిపించేందుకు హిట్ మ్యాన్​ రోహిత్ రెడీ అయ్యాడు. ఈ క్రమంలో సారథ్య బాధ్యతలు చేపట్టిన రోహిత్​..టీమ్‌ఇండియా సన్నాహాలు, ఆటగాళ్ల గాయాలు, సెలక్షన్‌ తదితర అంశాల గురించి తాజాగా మీడియాతో మాట్లాడాడు. ఆ విశేషాలు అతడి మాటల్లోనే..

Rohit Sharma World Cup 2023 : కెప్టెన్‌గా కంటే ఓ బ్యాటర్‌గానే భారత జట్టులో తన పాత్ర కీలకమని టీమ్ఇండియా కెప్టెన్​ రోహిత్‌ శర్మ అన్నాడు. గత రెండేళ్లలో వివిధ ఫార్మాట్లకు సారథ్య బాధ్యతలు వహించిన హిట్​ మ్యాన్​.. అక్టోబరులో సొంతగడ్డపై ప్రారంభం కానున్న ప్రతిష్టాత్మక వన్డే ప్రపంచకప్​లో కూడా జట్టును ముందుండి నడిపించనున్నాడు. ఈ నేపథ్యంలో టీమ్‌ఇండియా సన్నాహాలు, ఆటగాళ్ల గాయాలు, సెలక్షన్‌ తదితర అంశాల గురించి తాజాగా మీడియాతో మాట్లాడాడు. ఆ విశేషాలు అతడి మాటల్లోనే..

Rohit Sharma About Captaincy : నా తొలి ప్రాధాన్యం బ్యాటింగ్‌కే ఇస్తాను. దాని తర్వాతే కెప్టెన్సీ. టీమ్​లో నా పాత్ర ప్రధానంగా బ్యాటర్‌గానే ఉండాలని అనుకుంటాను. భారీ స్కోర్లు సాధించి జట్టును గెలిపించడమే లక్ష్యంగా భావిస్తాను. దీంతో పాటు నాయకత్వ బాధ్యతలు కూడా సమర్థంగా నిర్వర్తించాలి. ఇక రానున్న ప్రపంచకప్‌ జట్టుకు సారథ్య బాధ్యతలు వహించడం కోసం ఆసక్తిగా ఎదురు చూస్తున్నాను.

నేనింత వరకు ఒక్క వన్డే ప్రపంచకప్‌ను అందుకోలేదు. అది నాకొక కల. దాని కోసం పోరాడటం నాకెంతో ఆనందాన్ని ఇస్తుంది. అయితే ప్రపంచకప్‌ అంటే పళ్లెంలో తెచ్చి పెట్టి ఇవ్వరు. అందుకోసం ఎంతో శ్రమించాలి. 2011లో ప్రపంచకప్‌ గెలిచినప్పటి నుంచి ఇప్పటి వరకు మా జట్టు మళ్లీ ఆ కప్పును ముద్దాడేందుకు శ్రమిస్తోంది. ప్రతి ఒక్కరూ ట్రోఫీ గెలిచే విషయంలో కసిగానే ఉన్నారు. మాకు మంచి జట్టుంది. మేమందరం మెరుగైన ఆటగాళ్లమే. ఇది సాధించగలమన్న ఆత్మవిశ్వాసం, నమ్మకం మా అందరిలోనూ ఉంది.

Rohit Sharma About Fitness : మాలో కొందరికి ఫిట్‌నెస్‌ సమస్యలున్నాయి. దీంతో గత ఏడాది టీ20 ప్రపంచకప్‌కు ముందు వన్డేలు ఆడటం తగ్గించాం. అయితే ఇప్పుడు వన్డే ప్రపంచకప్‌ నేపథ్యంలో చాలామంది టీ20లు ఆడట్లేదు. ప్రపంచకప్‌కు ముందు ప్రతి మ్యాచ్‌ ఆడేయకూడదు. రెండేళ్ల ముందు నుంచే ఈ విషయంలో చాలా ప్రణాళికలు వేసుకున్నాం. నేను, కోహ్లి టీ20లు ఆడకపోవడం గురించి అందరూ మాట్లాడుతున్నారు. కానీ జడేజా కూడా టీ20లు ఆడట్లేదు. అతన్ని అడగరేం? ప్రపంచకప్‌ సంవత్సరంలో ఆటగాళ్లందరూ యాక్టివ్​గా ఉండేలా చూస్తున్నాం. ఇప్పటికే మా జట్టులో పలువురికి గాయాలయ్యాయి. ఇప్పుడు కూడా ఆ గాయాల భయం మమల్ని వెంటాడుతోంది. అందుకే ఏమాత్రం అవకాశం ఉన్నా ఆటగాళ్లకు విశ్రాంతినిచ్చే ప్రయత్నాన్ని చేస్తున్నాం. బీసీసీఐతో కూడా ఈ విషయం గురించి మాట్లాడాం.

Rohit Sharma About Surya Kumar Yadav : ఇక సూర్యకుమార్‌ యాదవ్‌ కూడా వన్డేల్లో మెరుగయ్యేందుకు బాగా కష్టపడుతున్నాడు. ఈ ఫార్మాట్లో ఎక్కువ అనుభవం ఉన్న వారితో మాట్లాడుతున్నాడు. అందుకు తగ్గ దృక్పథం అలవరుచుకోవడానికి కూడా సూర్య కుమార్​ ప్రయత్నిస్తున్నాడు. అలాంటి ఆటగాడికి వీలైనన్ని ఎక్కువ అవకాశాలు ఇచ్చి ఆత్మవిశ్వాసం పెంచేందుకు చూడాలి. ఐపీఎల్‌లో ఈ ఏడాది కొన్ని మ్యాచ్‌ల్లో అతను పెద్దగా పరుగులు సాధించలేదు. కానీ తర్వాత ఎలా ఆడాడో అందరూ చూశారు. 'రెండు మూడు మ్యాచ్‌ల్లో విఫలమైనా పర్వాలేదు, నువ్వు నిలదొక్కుకుంటే జట్టును గెలిపించగలవు'.. అంటూ అతడిలో ఆత్మవిశ్వాసం పెంచడానికి ప్రయత్నిస్తున్నాం.

వన్డేల్లో నాలుగో స్థానంలో ఎవరిని ఎంపిక చేసుకోవాలన్న సమస్య చాన్నాళ్లుగా ఉంది. యువరాజ్‌ సింగ్‌ తర్వాత ఇప్పటివరకు ఎవ్వరూ ఆ స్థానంలో నిలదొక్కుకోలేదు. ఇది చాలా సుదీర్ఘ కాలం. ఆ స్థానంలో శ్రేయస్‌ కొన్నాళ్లు బాగా ఆడాడు. తన గణాంకాలు కూడా బాగున్నాయి. దురదృష్టవశాత్తూ గాయాలు అతణ్ని ఇబ్బందుల్లోకి నెట్టాయి. ఆ స్థానంలో ఆడిన మరికొందరు ఆటగాళ్లకు కూడా గాయాలయ్యాయి. చాలామంది వచ్చారు.. వెళ్లారు. కానీ ఎవ్వరూ ఆ స్థానంలో నిలదొక్కుకోలేకపోయారు.

అయితే జట్టులో ఎప్పుడూ ఎవరి స్థానాలకూ గ్యారెంటీ ఉండదు. చివరికి నా విషయంలో కూడా అంతే. శ్రేయస్‌ అయ్యర్‌, కేఎల్‌ రాహుల్‌లకు పెద్ద గాయాలే అయ్యాయి. సర్జరీలు జరిగాయి. నాలుగు నెలల పాటు ఆటకు దూరంగా ఉండాల్సిన పరిస్థితి వచ్చింది. ఇలాంటి స్థితి నుంచి కమ్​బ్యాక్​ ఇవ్వడం అంత తేలిక కాదు. మరి వాళ్లెలా స్పందిస్తారో చూడాలి. ఆసియా కప్‌ కోసం జట్టు ఎంపిక మరి కొన్ని రోజుల్లో జరుగుతుంది. జట్టులోని ప్రతి స్థానం కోసం గట్టి పోటీ ఉండనుంది. ఎవరికీ అంత తేలిగ్గా చోటు దక్కదు. ఇప్పటికే చాలా పేర్లు పరిశీలనలో ఉన్నాయి. మాకు కలిసొచ్చే అంశాలను చూసుకుని ఆటగాళ్లను ఎంచుకుంటాం.

Rohit Sharma About Tilak Varma : ఇక తిలక్‌ వర్మ నమ్మదగ్గ ఆటగాడిలా కనిపిస్తున్నాడు. రెండేళ్లుగా తన ఆట తీరును చూస్తున్నాను. తనకు ఆట పట్ల ఉన్న కసి మాకు తెలుస్తోంది. అదే అన్నింటికంటే ముఖ్యమైన విషయం. ఆ వయసులో అంత పరిణతితో ఆడటం అనేది అరుదైన విషయం. తన బ్యాటింగ్‌ కూడా చూడముచ్చటగా ఉంటుంది.

ఏ స్థితిలో ఎలా ఆడాలో, ఎప్పుడు ఎటువంటి షాట్​లు కొట్టాలో తనకు బాగా తెలుసు. ఇప్పటికైతే తిలక్‌ గురించి ఇంతే చెప్పగలను. ప్రపంచకప్‌ సంగతి నాకు తెలియదు. తిలక్‌ ప్రతిభావంతుడనే విషయం ఇప్పటిదాకా ఆడిన కొన్ని మ్యాచ్‌ల్లోనే రుజువైంది.