Riyan Parag Domestic Cricket : రియాన్ పరాగ్..ఐపీఎల్ ప్రియులకు ఈ పేరు సుపరిచితమే. ఒకానొక ఐపీఎల్ సీజన్లో బాగా ఆడి పేరు తెచ్చుకున్న ఈ అసోం ఆల్‌రౌండర్‌.. ఆ తర్వాత వరుస పరాభవాలతో ఢీలా పడ్డాడు. అలాంటి ఆటగాడు వరుసగా ఆరు అర్ధసెంచరీలు సాధిస్తే ఎలా ఉంటుంది. అందులోనూ టీ20 ఫార్మాట్లో ఇలాంటి ఘనతను సాధిస్తే ఎలా ఉంటుంది. తాజాగా పరాగ్ ఇదే చేసి చూపించాడు.
టీ20ల్లో వరుసగా మూడు అర్ధసెంచరీలు చేయడం కష్టం. అలాంటిది ఈ ఫార్మాట్లో నిలకడగా రాణించి 50 దాటాలంటే కొంచెం అదృష్టం కూడా కలిసి రావాల్సి ఉంటుంది. అలాంటిది ఒకటి కాదు రెండు కాదు ఏకంగా ఆరు అర్ధ సెంచరీలు చేసి.. 21 ఏళ్ల రియాన్ పరాగ్ ఓ అరుదైన రికార్డును తన ఖాతాలో వేసుకున్నాడు. తాజాగా జరిగిన సయ్యద్‌ ముస్తాక్‌ అలీ టీ20 టోర్నమెంట్లో పరాగ్ ఈ ఘనత సాధించాడు. ఇప్పటిదాకా ఆడిన 7 ఇన్నింగ్స్‌ల్లో అతడు 440 పరుగులు చేశాడంటే అతని ఆటతీరును మనం ఇట్టే అర్థం చేసుకోవచ్చు.
9 మ్యాచ్లు.. 8 అర్ధసెంచరీలు..
ఆడిన ఆరు మ్యాచ్‌ల్లో 6 అర్ధసెంచరీలు చేసి రికార్డు సృష్టించడమే కాదు.. ఈ సీజన్లో దేవధర్‌ ట్రోఫీ, ముస్తాక్‌ అలీ టోర్నీల్లో కలిపి 9 దేశవాళీ మ్యాచ్‌ల్లో 8సార్లు హాఫ్ సెంచరీలను నమోదు చేశాడు పరాగ్. ఇందులో ఓ మెరుపు సెంచరీ కూడా ఉండటం విశేషం. 193 స్టైక్‌రేట్‌తో పరాగ్ పరుగులు చేస్తూ అందరిని అబ్బురపరిచాడు.
ఇక ముస్తాక్‌ అలీ టోర్నీలో వరుసగా చండీగఢ్, సర్వీసెస్, బిహార్, సిక్కిం హిమాచల్‌ప్రదేశ్‌పై అర్ధసెంచరీలు చేసి వీరేంద్ర సెహ్వాగ్, డెవోన్‌ కాన్వే, వార్నర్, మసకద్జ, కమ్రాన్‌ అక్మల్, బట్లర్‌ సరసన నిలిచిన రియాన్.. కేరళపై అజేయంగా 57 పరుగులు సాధించి తన ఖాతాలో ఈ సరికొత్త రికార్డును వేసుకున్నాడు. ప్రస్తుతం ముస్తాక్‌ అలీ టోర్నమెంట్లో అతడే టాప్‌ స్కోరర్ కావడం విశేషం. ఈ టోర్నీకి ముందు దేవధర్‌ ట్రోఫీలో కూడా తన జోరును ప్రదర్శించాడు. చెత్త షాట్లను పక్కనపెట్టి తెలివిగా ఆడడం మొదలుపెట్టిన ఈ కుర్రాడు.. ఆ తర్వాత పరుగుల వరద పారించాడు.
ఐపీఎల్‌లో అలా దేశవాళీలో ఇలా..
2023 ఐపీఎల్ సీజన్లలో రాజస్థాన్‌ రాయల్స్‌కు ఆడిన రియాగ్.. అక్కడ దారుణంగా విఫలమయ్యాడు. 7 మ్యాచ్లు ఆడి 78 పరుగులే సాధించాడు. దీంతో అతనికి ఆటిట్యూడ్‌ ఎక్కువ.. ఆట తక్కువ అంటూ అభిమానుల నుంచి విమర్శలు ఎదుర్కొన్నాడు. వరుస వైఫల్యాలు, విమర్శలు ఇలా ఈ రెండూ రియాన్ను కిందకు నెట్టాయి.
రాజస్థాన్‌ రాయల్స్‌ అతడిని వదులుకోవడం ఖాయం అనే మాటలను సైతం ఎదుర్కొన్నాడు. ఇలాంటి ఇబ్బందికర పరిస్థితిలో పరాగ్ మళ్లీ వేగం పుంజుకున్నాడు. బ్యాటింగ్‌పై దృష్టి పెట్టి.. తనలో ఉన్న లోపాలను సరిదిద్దుకుని దేశవాళీ పోటీల్లో దిగాడు. నెమ్మదిగా ఫామ్ అందుకుంటున్నాడు. దేశవాళీ మ్యాచ్‌ల్లో అదరగొడుతున్నాడు. బ్యాటింగ్‌లోనే మాత్రమే కాదు బౌలింగ్‌లోనూ సత్తా చాటుతూ చెలరేగుతున్నాడు.
Riyan Parag Mushtaq Ali Trophy : ఇటీవలే ముస్తాక్‌ అలీ టోర్నీలో సర్వీసెస్‌పై 9 పరుగులకే 3 వికెట్లు పడగొట్టి జట్టును గెలిపించాడు. ఇప్పటిదాకా ఆడిన 7 మ్యాచ్‌ల్లో 9 వికెట్లు పడగొట్టాడు. ఈ టోర్నీకి ముందు దేవధర్‌ ట్రోఫీలో ఈస్ట్‌జోన్‌కు ఆడి 354 పరుగులు, 11 వికెట్లు తీసి ప్లేయర్ ఆఫ్‌ సిరీస్‌గా నిలిచాడు. వెస్ట్‌జోన్‌తో మ్యాచ్‌లో 68 బంతుల్లోనే అజేయంగా 105 పరుగులు చేసి సత్తా చాటాడు. తాజా ప్రదర్శనలతో పరాగ్ రాజస్థాన్‌ రాయల్స్‌ను ఆలోచనలో పడేయడమే కాకుండా భారత సెలక్టర్ల దృష్టిలో కూడా పడ్డాడు. ఈ జోరు ప్రదర్శిస్తే ఈ బ్యాటింగ్‌ ఆల్‌రౌండర్‌ని రానున్న టీ20 సిరీస్‌లో భారత జట్టులో చూడొచ్చని అభిమానులు భావిస్తున్నారు.
Deodhar Trophy Riyan Parag : 'ఓవరాక్షన్‌ ప్లేయర్' అన్న నోళ్లతోనే.. శభాష్‌ అనిపించుకుంటూ...
